Grímur Atlason fyrir Vestan

Eyjan kallar!

2007-06-25T09:15:00.000Z

Ég flyt - enda gaman þegar menn búa eitthvað nýtt og skemmtilegt til. Fer hingað: www.eyjan.is/grimuratlason

Hið lítt þekkta boðorð

2007-06-21T08:26:00.001Z

Halldór er stórkostlegur í skopteikning í Viðskiptablaðinu á þriðjudaginn. Þar kynnir hann til leiks hið lítt þekkta 11. boðorð – svokallaða Vestfjarðaviðbót:

11. Þú skalt síðan kenna kvótakerfinu um hvað lífið er hundleiðinlegt.

B.K. Guð.

Víðtækar sértækar aðgerðir

2007-06-19T13:29:00.000Z

Ríkisstjórnin hélt fund í morgun. Umræðuefnið var m.a. tillögur Hafró um aflaniðurskuð á komandi fiskveiðiári og áhrif þeirra á sjávarbyggðirnar. Ráðherrar keppast við að tíunda að bregðast verði við ástandinu en þó aðeins með almennum aðgerðum til framtíðar eins og samgöngubótum, eflingu fjarskiptamála og eflingu menntastofnana. Allt mjög gott - sé horft til lengri tíma.

Þegar Össur Skarphéðinsson var spurður út í hvort til greina kæmi að beita sértækum aðgerðum svaraði hann: Það liggur alveg ljóst fyrir að það er ekki hægt að fara í víðtækar sértækar aðgerðir.

Hvað ætli það þýði þegar farið er í víðtækar sértækar aðgerðir? En þegar ekki er hægt að fara í víðtækar sértækar aðgerðir?

Fiskur og annað

2007-06-17T18:18:00.000Z

Geir H. Haarde hélt hátíðarræðu fyrir sunnan í dag. Hann talaði m.a. um fiskveiðistjórnunarkerfið og tillögur Hafró. Ég verð að játa að það ræða forsætisráðherra gerði mig nett stressaðan part úr degi. Þá sérstaklega þessi hluti ræðunnar:

Hverjum manni er það ljóst að þjóðin er nú betur í stakk búin til að takast á við áföll á þessu sviði en oftast áður. Nú er meiri viðspyrna og við höfum betri efni á að líta til lengri tíma og taka á okkur byrðar sem létt gætu róðurinn síðar. Það eru hyggindi sem í hag koma.

Það kvað við nokkuð afgerandi tón hjá Sturlu Böðvarssyni sem hélt hátíðarræðuna á Ísafirði í dag. Ég hef ekki alltaf verið sammála Sturlu en að þessu sinni tel ég hann að mörgu leyti hafa hitt naglann á höfuðið. Hann sagði fiskveiðistjórnunarkerfið hafa mistekist og við því þyrfti að bregðast. Hann sagði einnig:

Aðrir landshlutar svo sem höfuðborgarsvæðið, Suðurnes og miðausturland munu eflast með stóriðjunni og vegna vaxandi fjármálastarfsemi, stjórnsýslu, þjónustu opinberra stofnana sem starfa á landsvísu mun höfuðborgarsvæðið stöðugt eflast. Þeir landshlutar verða að gefa eftir hlutdeildina í sjávarútvegi til þeirra landshluta sem geta best nýtt fiskimiðin á hagkvæman hátt og skapað vinnu við sjávarútveginn.

Þegar ræðurnar eru lesnar saman má lesa ákveðinn samhljóm. Geir sagði nefnilega líka:

Það er skylda ríkisvaldsins að koma þeim byggðarlögum til hjálpar þar sem grundvöllur atvinnustarfsemi og samfélags brestur, hvort sem það er í sjávarútvegi eða öðrum greinum.

Ég trúi því að ríkisstjórnin ætli sér að beita svæðisbundnum aðgerðum – það er vel hægt og þarf að gera. Fagna ræðu Sturlu.

25 ár

2007-06-14T09:29:00.000Z

Það eru 25 ár síðan Falklandseyjastríðinu lauk. Ég man þetta stríð eins og það hafi gerst í gær. Þetta mikla minni hófst reyndar á því að Díana og Karl gengu í það heilaga ári áður. Þá elskuðu allir ungir menn Díönu og var ég ekki undanskilinn. Ég var mjög andsnúinn þessum ráðahag og var á þeim buxunum að ganga yfir Hellisheiði eystri, inn Vopnafjörðin að Hofsá og segja Karli, þar sem hann stóð og veiddi lax, að ég sæi þessu verðandi hjónabandi allt til foráttu. Hefði betur gert það og þá væri staða Díönu allt önnur. Hún væri fráskilin 2 barna móðir í Grafarvoginum og ég hamingjusamlega giftur í Bolungarvík henni Helgu Völu. Þetta jarðsprengjufetis prinsessunnar og ást hennar á ljótum drögtum hefðu aldrei gengið. En blessuð sé minning hennar.

Falklandseyjar gerðust hins vegar ári síðar og þá var ást mín á Díönu löngu kulnuð og ég kominn í sveit í Hrútafjörðin. Það var á Kollsá sem Argentínumenn gáfust upp. Paulo Rossi skoraði 4 mörk á HM og varð markahæstur og hetja Ítala sem urðu heimsmeistarar í fótbolta. Það sem mér þótti athyglisverðast var veitingahúsaeigandinn sem komst í fréttirnar af því hann ætlaði að bjóða Rossi ókeypis að borða á veitingahúsi sínu það sem hann ætti eftir ólifað. Veit ekki hvort þetta yrði frétt í dag – í heimi mammons. Hvar er Rossi í dag?

Það sem skelfir mig að mér þykir svo stutt síðan að þetta gerðist. Tuttugu og fimm árum fyrir Falklandseyjastríðið hófst Marshallaðstoðin – það segir allt sem segja þarf: Ég er að verða gamall......

Íbúðalánasjóður þarf að vera til

2007-06-12T20:31:00.000Z

Íbúðalánasjóður er góð stofnun að mörgu leyti. Hún er lífsnauðsynleg fyrir íbúa utan höfuðborgarsvæðisins. Það er fráleitt að ætla að stofnunin beri ábyrgð á hækkun á fasteignamarkaðnum og auknum lántökum heimilana - eða að Íbúalánasjóður dragi úr hagvexti. Þar bera bankarnir ásamt stjórnvöldum, sem framkvæmdu jafnframt því sem þau hleyptu bankakerfinu á skeið, mesta ábyrgð. Það er hins vegar er galli á gjöf Njarðar þegar Íbúðalánasjóður er annars vegar. Sumir njóta betri kjara en aðrir:

Á Vestfjörðum er hámarkslán Íbúðalánasjóðs 18 milljónir þó aldrei hærra en sem nemur 1.5 x fasteingamat.
Í Reykjavík er sama hámark en þó aldrei hærra en sem nemur 80% af brunabótamati.
Á Austfjörðum er sama hámark en þó aldrei hærra en sem nemur 2.0 x fasteignamat.

Þetta er einkennilegur reikningur. Hvers vegna er ekki stuðst við 80% af brunabótamati út um allt land? Fer fólk ekki í greiðslumat og fær úr því skorið að það geti greitt af lánum sínum?

En við erum á mikilli furðusiglingu. Las þetta á visir.is áðan:

Mikil eftirspurn er eftir lúxusíbúðum í miðborg Reykjavíkur. Í skuggahverfi rísa nú háhýsi þar sem íbúðirnar koma til með að kosta allt að 230 milljónir króna.

Vonandi pissar kötturinn ekki í stigaganginn....

Uppruni tegundanna

2007-06-11T09:36:00.001Z

Ætla að leita upprunans í sumar. Reyndar má segja að með því að flytja vestur hafi sú leit hafist enda hálfur að vestan. Hins vegar hef ég aldrei komið á Hornstrandir en þaðan komu þessi heljarmenni sem lifðu af aldamótin þar síðustu og settust að í Súðavík. Við Helga Vala ætlum því að eyða nokkrum dögum það nyrðra í sumar.

Langalangafi minn Jón Valgeir Hermannsson var mikill víkingur úr Furufirði en hann náði því að verða 94 ára sem þykir býsna gott í dag og næsta fáheyrt á þeim tíma sem hann var uppi. Hann skaut ísbjörn, lóðsaði skip um erfiðar siglingaleiðir og gróf tvö barna sinna í skafl þegar ekki var hægt að taka gröf vegna frosta. Ég held að heljarmenni sé réttnefni í þessu samhengi. Við eigum sama afmælisdag ég og hann Jón Valgeir en ég var skírður í höfuðið á syni hans Grími Jónssyni.

Smábátar

2007-06-09T12:16:00.000Z

Ég fékk að fylgja með á línuveiðar í gær á einu af flaggskipum Bolungarvíkur - sem er smábátur. Ég fékk að taka þátt – svona þegar störfin voru þess eðlis að ég þvældist ekki fyrir mönnum að störfum. Þetta var mögnuð lífsreynsla fyrir gamlan borgarlúða eins og mig. Ekki það sveitadvöl og Raufarhafnardvalir frá barnæsku afeitruðu mig að hluta en ég fór aldrei á sjó. Já, ég var alveg heillaður – ætla samt ekki að setja mig á of háan hest. Við vorum á sjó í frábæru veðri og algjöru logni. Það er á hreinu að 7 vindstig, hríð og frost hefðu breytt þessari mynd umtalsvert.

Það má vel spyrja sig hvers vegna við Íslendingar höfum ekki algjörlega snúið við blaði í tengslum við fiskveiðar? Smábátur eyðir 15% af þeirri olíu sem stærri skip eyða per kíló veidd úr sjó. Línan og færin eru allt önnur veiðafæri en botnvarpan. Ágætur maður lýsti sem svo að það væri eins og að fara í berjamjó á jarðýtu að nota botnvörpu til veiða.

Nú þegar allt virðist vera komið á hvolf í fiskveðastjórnunarkerfin er augljóst að breytinga er þörf. Því ekki að taka upp vistvænar og byggðavinsamlegar fiskveiðar? Þá er ég ekki að segja að allir þeir sem veiða á annað en línu og færi eigi að sigla í land – en það þarf að stórauka þær veiðar. Það hefur sýnt sig að þessir smábátar geta veitt yfir 1000 tonn á fiskveiðiári og hver bátur skapar um 10 manns vinnu. Hvers vegna er ýsa kvótasett – það er ekki einu sinni hægt að veiða öll tonnin sem eru í boði? Það væri stórt skref í áttina að heimila ýsu og steinbítsveiðar og hafa dagana óframseljanlega. Síðan á að stórauka heimildir til þorskveiða í litla kerfinu – og best væri að það væri gert með því að auka kvóta byggðalaga sem síðan framseldu þær smábátum á svæðinu.

Það skapast auðvitað lítil sátt með þessum vangaveltum – en það skapast heldur engin sátt um kerfið eins og það er í dag.

Á mölinni

2007-06-05T00:58:00.000Z

Hafliði Helgason á Fréttablaðinu ákvað að vera svolítið töff og svona hundraðogeinskur í leiðara um helgina. Líkti Flateyri og Vestmannaeyjum við Djúpuvík og Haganesvík. Alveg hreint klassísk borgar-analýsa fylgdi:

Enda þótt full ástæða sé til að hafa samúð með því fólki sem þróunin sviptir vinnunni er engu að síður nauðsynlegt að horfast í augu við staðreyndir. Samkeppni við fiskvinnslu annar staðar, svo sem í Kína, mun þýða að fiskvinnsla á Íslandi á ekki möguleika ef greinin á að standa undir lífskjörum sem eru einhvers staðar í námunda við núverandi lífskjör. Rækjubrauðsneið á veitingastað í Kaupmannahöfn er með Norðursjávarrækju sem landað er á Jótlandi, þaðan er ekið með hana til Póllands og hún send pilluð til baka til Kaupmannahafnar.

Merkileg er einföldun. Bækur eru prentaðar í Eistlandi, föt eru saumuð í Víetnam, forrit gerð á Indlandi og stál framleitt í Kína. Allt hefur þetta áhrif á störf hér í gamla heiminum. Prentarar, skraddarar, járnsmiðir og forritarar finna fyrir afleiðingunum. Atvinnuleysi fer vaxandi í hinum vestræna heimi og menn hafa áhyggjur af þróuninni. Lífskjör batna ekki við þróun Hafliða – hún er ágæt meðan hún varir en springur í andlitið á okkur fyrr en varir.

Það er ótrúleg bernska að halda að þensluspilaborgin standi til eilífðar. Hún er ekki byggð á traustum grunni sem stendur allt af sér. Ofurtrú manna á peningum og óforgengileika mun koma mönnum í koll.

Þróunin sem Hafliði talar um þegar hann ber byggðirnar sem fóru í eyði á síðustu öld við þær byggðir sem hafa lent í áföllum í dag er afskaplega vond. Djúpavík og Haganesvík urðu aldrei að 20. aldar byggðum ólíkt Vestmannaeyjum og Flateyri sem staðið hafa af sér hremmingar aldanna.

Hafliði lýkur þessum borgarvísindum sínum svona:
Þetta eru staðreyndirnar sem blasa við. Mótbárur við þessari þróun eru oft á rómantískum grunni fremur en raunsæjum. Afnám kvótakerfisins myndi engu breyta um þróunina.

Hvaða þróun? Að vestræn fyrirtæki þurfi sífellt að skila meiri arði og því framleiða þau allt í 3. heiminum og stórauka þannig félagsleg vandamál í heimalöndum sínum auk þess sem siðferðisþröskuldar nær hverfa með fyrirbærum eins og barnaþrælkun o.fl.? Eða er það bara Flateyri og Raufarhöfn og að allir flytji burt í Grafarvoginn vegna þess að fiskveiðar- og vinnsla leggst af? Hefur verið látið reyna á nýtt kerfi?

Það verður að gera greinarmun á þróun og náttúrulögmálum. Byggðaþróun er ekki dæmi um náttúrulögmál. Mennirnir hafa talsverð áhrif á þróun atvinnu- og byggðamála. Ég held að okkur væri nær að taka upp nýja hugsun sem byggir á sjálfbærri vistvænni hugsun sem tæki mið af þörfum sem flestra – ekki aðeins bankakerfisins.

Hafró

2007-06-02T18:10:00.001Z

Veiðihlutfall þorsks verði 20% í stað 25% leggur Hafró til - kemur á óvart segja menn. Kemur mér ekki á óvart þar sem þetta hefur verið rætt í allan vetur og er m.a. ástæða þess að sumir hverfa úr greininni. Ég held að ríkisstjórnin ætti að hraða hugmyndavinnu og skoða þær hugmyndir sem lagðar hafa verið fram til uppbyggingar atvinnu á svæðum eins og Vestfjörðum og NA-landi. Aðgerða er þörf – það er alveg ljóst.

Sjómannadagar

2007-06-02T09:52:00.000Z

Í sól og blíðu sit ég og hlusta á rokfréttir úr Reykjavík. Hátíð hafsins er þar haldin en hér fyrir vestan er sól. Sjómannadagurinn teygir sig yfir 3 daga hér í Víkinni og ég ætla að taka þátt í mörgu. Dauðlangar í belgjaslag og detta í höfnina en veit ekki hvernig það fer með gigtina...En þetta er dagskrá helgarinnar:

Laugardagur:
11:00 Skemmtisigling með stærri sem smærri bátum.
14:00 Skemmtidagskrá við höfnina: Kappróður, belgjaslagur, flekahlaup, keppni í sjómanni o.fl. 19:30 Hátíðarkvöldverður með skemmtun í Víkurbæ, Brynja Valdís fer með gamanmál, Regína Ósk, Friðrik Ómar og Grétar Örvarsson syngja og leika tónlist og Hrólfur Vagnsson sér um „dinner“ tónlist.
23:00 Dansleikur með Eurobandinu í Víkurbæ.
23:00 Kjallarinn opinn.

Sunnudagur:
10:15 Skrúðganga frá brjótnum.
11:00 Sjómanndagsmessa í Hólskirkju.
14:00 Kaffiveitingar í húsi slysavarnarfélagsins. Á neðri hæð hússins verður sýnd mynd um Bolungarvík (gamla tímann) sem er í eigu Lárusar Benediktssonar.

Gemsar

2007-05-31T21:02:00.001Z

Merkilegar eldhúsdagsumræður. Gríðarlegt ráp og óþol í þingmönnum og ráðherrum þann stutta tíma sem þessar umræður fóru fram. Gemsar, pukur og fliss. Er ekki hægt að banna síma í þingsal? Er ekki eðlilegt að fólk sitji í sætum sínum þessa stuttu þingfundi sem kallast eldhúsdagsumræður?

Reykingabann

2007-05-24T13:10:00.000Z

Mikið var ég hamingjusamur þegar ég fékk sendingu í dag sem minnti mig á að veitinga- og skemmtistaðir verða reyklausir frá og með 1. júní 2007. Það eru talsverðar líkur á því að ég gerist þaulsetnari á kaffihúsum og veitingahúsum Íslands eftir 1. júní nk. heldur en ég nú er.

Fiskveiðistjórnunarkerfi og grunnþjónusta

2007-05-23T23:38:00.001Z

Fiskveiðastjórnunarkerfið, sem komið var á fyrir rúmum 20 árum, átti að styrkja byggðirnar og vernda fiskinn. Við lögleiðingu þessa kerfis má segja að nútímavæðing sjávarútvegsins hafi hafist og bein afskipti ríkisins fóru minnkandi með hverju árinu sem leið. Í dag er það lögmál frelsisins sem ræður ríkjum með öllum þeim kostum og göllum sem slíku fylgir. Veruleg hagræðing hefur átt sér stað í sjávarútveginum og hefur það leitt af sér meiri verðmætasköpun og meiri hagnað fyrirtækjanna.

Gallar kerfisins eru hins vegar stórkostlegir. Samþjöppunin og hagræðingin hefur komið af stað vítahring þegar kemur að verðlagningu kvóta – og gildir það jafnt um kaup og leigu. Það er hagur kvótaeigandans að hlutabréf hans, sem í þessu tilfelli eru óveiddir fiskar, hækki jafnt og þétt. Þetta hvetur til brasks því enginn ætlar sér að missa af lestinni né detta af baki ef verðin skyldu lækka. Þegar slíkt umhverfi blandast saman við óstöðugleika í efnahagslífinu eins og við höfum gengið í gengum undanfarin ár er voðinn vís.

Í dag má segja að útgerðin sé á öldutoppi. Afurðaverð er gott og kvótaverð aldrei hærra. Það eru hins vegar blikur á lofti. Hugsanlegt þykir að Hafró skeri niður hámarksafla næsta ár og krónan fer hækkandi. Það er óheilbrigt að við slíkar aðstæður sitji eitt fyrirtæki í hverju þorpi með allt atvinnulífið á staðnum í höndunum.

Leiðarahöfundur Morgunblaðsins þann 20. maí sl. ber stöðuna á Flateyri í dag saman við stöðuna í Bolungarvík árið 1993 þegar stórveldi EG sigldi í þrot. Vissulega er staðan sambærileg að því leyti að stór hluti bæjarbúa starfaði þá hjá EG líkt og hjá Kambi á Flateyri. Munurinn liggur hins vegar í þeim verðmætum sem liggja í kvótaeigninni og þeirri breytingu sem orðið hefur á veðsetningu og viðskiptum með aflaheimildir. Þeir sem stóðu að EG höfðu ekki í hyggju að leggja upp laupana en neyddust til þess, þeir áttu ekki þá útgönguleið sem blasir við eigendum Kambs. Þeir aðilar eru reyndar enn að starfa við sjávarútveg í Bolungarvík. Málin eru því í raun gjörólík. Annað fyrirtækið varð gjaldþrota á meðan hitt leggur upp laupana og fer út úr greininni með gríðarlega fjármuni vegna sölu aflaheimilda.

Það er rétt athugað hjá leiðarahöfundi Morgunblaðsins þegar hann bendir á þá staðreynd að eins sé farið víða um land. Með óbreytt fiskveiðistjórnunarkerfi má búast við því að sagan frá Flateyri endurtaki sig. Kerfið býður upp á þessa útgönguleið sem þýðir að menn geta gengið út með milljarða úr greininni og eftir situr heilt byggðarlag með sárt ennið. Út um allt land eru strangheiðarlegir útgerðarmenn sem ætla sér fyrst og fremst að gera það sem þeir gera best: að gera út. Þeir nýta aflaheimildir sínar til fulls og eru ábyrgir atvinnurekendur. En það er því miður ekki nóg. Fiskveiðistjórnunarkerfið hefur ekki styrkt byggðirnar heldur hefur algjörlega snúist upp í andhverfu sína. Við því verður að bregðast. Það hlýtur að teljast eðlileg krafa að hér sé um eitt brýnasta verkefni nýrrar ríkisstjórnar að ræða. Það þarf að endurvekja þá byggðahugsun sem var hluti af fiskveiðistjórnarkerfinu í upphafi og styrkja forgang fólksins í sjávarbyggðunum til þess að nýta auðlindina sem er hér rétt við bæjardyrnar.

Önnur verkefni nýrrar ríkisstjórnar, vegna stöðu Vestfjarða og annarra byggða landsins, snúast um grunnþjónustu. Uppbygging grunnþjónustunnar hefur gengið það hægt á Vestfjörðum að fábreytni í atvinnulífi er staðreynd og ný fyrirtæki þurfa að stíga yfir hærri þröskulda en í öðrum landshlutum vegna ástands fjarskiptamála, lélegs vegakerfis og lélegs raforkukerfis. Þetta er hið raunverulega ástand og það þýðir ekkert að malda í móinn með það – fiskveiðistjórnunarkerfið og seinagangi við uppbyggingu á grunnþjónustunni eru helstu orsakir stöðunnar.

Í þeirri stöðu sem nú blasir við á Vestfjörðum þurfa stjórnvöld, auk þess að endurreisa byggðahugsun í fiskveiðistjórnuninni fyrst og fremst að endurskoða samgönguáætlun frá grunni og hraða þarf verkefnum eins og frekast er unnt. Við jarðgangagerð þarf að hugsa til framtíðar ekki aðeins til dagsins í dag og því þarf að endurskoða framkvæmdir sem nú eru á teikniborðinu og taka djarfar ákvarðanir. Einnig þarf að huga strax að því að hringtengja rafmagn og setja línur í jörðu. Það er líka kominn tími til að standa við fyrirheit um að íbúar og atvinnulíf hér hafi sambærilegan aðgang að háhraðatengingum og öðrum Íslendingum þykir sjálfsagður. Þessi brýnu verkefni hafa beðið of lengi og ættu að vera efst á forgangslista nýrrar ríkisstjórnar.

The Who

2007-05-17T17:41:00.001Z

Var að hlusta á The Who þátt Óla Palla á Rúv áðan – milli þess sem ég sneyddi hjá steinum og holum á Hrafnseyrarheiði. Ég verð að játa að mér þótti aldrei mikið til koma Who og hreytti stundum ónotum í doktorinn þegar hann lofsöng Tommy og aðrar dyggðir The Who. Ég verð að játa að eftir að hafa rifjað upp með Óla Palla í eyrunum öll meistaraverk The Who tók ég ákvörðun að gefa þeim séns. Þetta er margt svo skrambi gott.

Spennandi tímar í landstjórnarmálum og blikur á lofti á Flateyri héldu mér þó við efnið og daginn í dag. Þetta er ansi brothætt kerfi sem við búum við þegar kemur að atvinnuöryggi sjómanna og fiskverkafólks. Vestfirðingar hafa fengið að reyna það sl. vikur og auðvitað allan þann tíma sem aflaheimildir hafa gengið kaupum og sölum. Krossgöturnar eru staðreynd að það þarf ekki að vera slæmt – það þarf stundum krossgötur til þess að komast á gæfubrautina að nýju. Tækifærin eru svo sannarlega hér – það er bara að búa við byggðarvinsamlega landsstjórn og framsýna ráðamenn. Við slíkar aðstæður þrífast frumkvöðlar best og þeirra tími er núna – fyrir Vestan.

Nýir vendir sópa best

2007-05-15T12:47:00.000Z

Við förum ekki í ríkisstjórn ef niðurstöður kosninganna vera í samræmi við skoðanakannanir. Það er lýðræðislegt að við drögum okkur í hlé. Þetta kepptust foringjarnir í Framsóknarflokknum við að segja alveg fram að kjördegi. 24 klst. síðar var allt breytt. Framsóknarflokkurinn skorast ekki undan ábyrgð....Í borgarstjórnarkosningunum fyrir tæpu ári síðan glumdu auglýsingarnar: Framsóknarflokkurinn er eini flokkurinn sem kemur í veg fyrir hreinan meirihluta Sjálfstæðisflokksins.

Er þetta ekki fullkomin lýsing á stjórnmálum á Íslandi? Hvar eru hetjurnar sem fórna sér þegar illa gengur? Mogens Lykketoft sem hélt sína bestu ræðu 30 mínútum eftir að ljóst var að honum hefði mistekist ætlunarverk sitt sem var að fella ríkisstjórn Venstre og Konsörvatívra. Hann sagði af sér enda bar hann pólitíska ábyrgð – flokkurinn galt afhroð. Á Íslandi er það nær undantekningalaust svo að menn hugsa fyrst og fremst um eigið skinn – ekki hagsmuni flokksins eða þjóðarinnar.

Það er alveg ljóst að landsmenn allir þurfa á nýrri ríkisstjórn að halda. Hún getur verið á marga vegu: Minnihlutastjórn D eða V og S. Meirihlutastjórn, D og S eða D og V nú eða V, S og B. Stjórnarseta B og D er orðin lúin og hún hefur um of bitnað á byggðum landsins. Vestfirðingar eiga þannig skilið eitthvað annað. Það er algjörlega á hreinu. Nýir vendir sópa best.

Ný skoðanakönnun!

2007-05-10T10:59:00.000Z

Skoðanakannanir eru ágætar sem slíkar en mikið óskaplega má ofgera hlutum. Úrtök eru greinilega æði misjöfn og forsendur eru sjaldnast gefnar upp. Þetta er þreytandi og þegar Agnes Bragadóttir sá ágæti blaðamaður býsnast yfir leiðindum kosningabaráttunnar væri ekki úr vegi að benda henni á að blaðið hennar gegnir lykilhlutverki í því að draga allan kraft úr baráttunni. Þegar skoðanakannanir eru farnar að verða að helstu kosningamálum flokkanna er eitthvað mikið að. Fyrsta spurning blaða- og fréttamanna til stjórnmálamanna snýst æ meira um að fá viðbrögð við nýjustu skoðanakönnunum. Þvílík leiðindi. Til að toppa leiðindin birti ég hér hávísindalega könnun sem var gerð á ónefndum vinnustað á Íslandi í aðdraganda kosninganna – 100% svarhlutfall.

B 20%
D 40%
F 0,0%
I 0,0%
S 40%
V 0,0%

Eigum við ekki bara að bregðast við þessu með viðtölum og greiningu í öllum fjölmiðlum landsins?

Leiðrétting

2007-05-08T15:30:00.000Z

Doktor Lýður hefur gert snilldar auglýsingar fyrir Frjálslyndaflokkinn. Hann er listamaður í eðli sínu - menn hafa líkt honum við Björk nú eða kallað hann fjöllistamann. Eins og listamönnum sæmir þá er sköpunarverkið ekki alltaf byggt á staðreyndum. Frelsi listamannsins til túlkunar er jú heilagt. Ég verð því að játa að fullyrðing Dodda um bæjarstjórann í Bolungarvík er byggð á sandi og óskhyggju doktorsins. En auglýsingin er meistaraverk.

Ramminn

2007-05-07T08:45:00.000Z

Það kom fram í máli sjávarútvegsráðherra á fundi um atvinnumál að vandi atvinnulífs í Bolungarvík væri tímabundinn og stafaði af erfiðleikum í tengslum við rækjuvinnslu. Ég er sammála Einari Kristni hvað fyrra atriðið varðar - vandinn er tímabundinn. Ég er hins vegar ekki viss um að rækjuvinnsla sé það sem rétta muni kúrsinn til lengri tíma litið. Sjávarútveginn þarf vissulega að styrkja og bæta hér á svæðinu en það er ýmislegt annað sem þarf að huga að. Stjórnvöld á hverjum tíma þurfa að búa til ramma sem íbúar, fyrirtæki og opinberir aðilar spila innan. Hérna fyrir vestan þarf að endurhanna rammann. Hver er stefna stjórnvalda og stjórnarandstöðu þegar kemur að þessum ramma?

Vestfirðingar ættu að fá svör við eftirfarandi spurningum frá öllum stjórnmálaflokkum, sem bjóða fram til Alþingis, áður en þeir ganga í kjörklefann á laugardaginn:

1. Kemur flutningsjöfnun í formi strandsiglinga eða eftir öðrum leiðum til greina og þá með hvaða hætti?
2. Á að stofna Háskóla á Vestfjörðum - hvaða deild(ir) og hvenær?
3. Þarf að auka tekjustofna sveitarfélaga - hvaða og hvenær?
4. Kemur til greina að beita sértækum svæðabundnum aðgerðum í skattamálum?
5. Kemur til greina að beita sértækum svæðabundnum aðgerðum í samgöngumálum?

Kató mælir enn með strandsiglingum

2007-05-03T09:42:00.000Z

Málefni Vestjarða hafa verið á döfinni í aðdraganda kosninga. Vandi sveitarfélaga á svæðinu hefur verið tíundaður ásamt stöðu atvinnulífs. Sett var á laggirnar nefnd sem átti að greina vandann og koma fram með tillögur til úrbóta. Skipan nefndarinnar kom mörgum Vestfirðingum á óvart enda margar tillögur löngu framkomnar og þekktar. Tillögur nefndarinnar voru nokkuð rýrar en þó ber að fagna hugmyndum um flutning opinberra starfa til Vestfjarða. Það er hins vegar aðeins hluti vandans og lítið skref í átt til lausnar á þeim verkefnum sem brýnust eru. Hægt væri að halda langa tölu um tekjustofna og innistæður sveitarfélaganna hjá ríkinu en ég trúi því bábiljan um að ríkið eitt eigi að njóta t.d. fjármagnstekjuskattsins sé á miklu undanhaldi.

Nefndin fjallaði m.a. um flutningsjöfnun sem er ekki skrýtið. Flestir eru sammála um að hár flutningskostnaður sé afar aðkallandi mál fyrir Vestfirði. Segir m.a. í skýrslunni: Umræða um mögulegar leiðir til að lækka flutningskostnað fyrirtækja á landsbyggðinni hefur átt sér stað um nokkurt skeið. Ein þeirra leiða sem hafa komið til umræðu er endurgreiðsla hluta flutningskostnaðar með það að markmiði að jafna samkeppnisstöðu fyrirtækja á landsbyggðinni (bls. 19). Þetta er allt rétt en nefndin kýs að velja aðeins eina leið í þessu samhengi og minnist ekki á önnur atriði. Niðurstöðurnar vekja furðu:
Nefndin telur vandkvæði við endurgreiðslukerfi vegna flutningskostnaðar vera nokkur og ekki síst þau að kerfið kann að hafa önnur áhrif en að er stefnt....Með hliðsjón af þessu óöryggi með árangur af slíku kerfi er það álit nefndarinnar að þeim kostnaði, sem af þessu hlytist fyrir ríkissjóð, væru betur varið í að efla og hlúa að opinberri þjónustustarfsemi á Vestfjörðum (bls. 19-20).

Þetta stóra mál, flutningskostnaður á landsbyggðinni og ekki síst á Vestjörðum, afgreiðir nefnd sem á að skila raunhæfum tillögum með tæpri blaðsíðu þar sem best er talið að gera ekki neitt. Eftir sitjum við og spyrjum okkur hvað nefndin veit sem við ekki vitum? Hvaða önnur áhrif en að var stefnt kann þessi leið að hafa? Hvers vegna var skautað svona létt yfir þennan mikilvæga kafla? Af hverju voru strandsiglingar ekki teknar sem kostur? Hafði það ekkert að segja að allar sveitastjórnir á Vestfjörðum höfðu tekið undir með sjávarútvegsklasa svæðisins að niðurgreiðsla með útboði á strandsiglingum væri raunhæfasta leiðin?

Raunveruleikinn er sá að sjávarútvegsfyrirtæki hagræða og það má vel vera að sjávarútvegsráðherra hafi rétt fyrir sér þegar hann fagnar því að aldrei í sögunni hafi sjávarútvegsfyrirtæki skilað jafn miklum arði og einmitt nú. Skuggahliðin á þessu er sú að vegna þess hve uppbygging grunnþjónustu á Vestfjörðum hefur gengið hægt og verið sett aftarlega á forgangslista ríkisstjórnarinnar veikjast stoðir byggðarlaganna á svæðinu. Með ríkisafskiptum og niðurgreiðslum var því komið þannig fyrir að allur útflutningur fer í gegnum Sundahöfn eða Keflavíkurflugvöll. Strandsiglingar lögðust af og eftir sitjum við með þungaflutninga á þjóðvegum landsins sem í besta falli geta tekið við 5-10 tonna flutningabílum – en þurfa að bera tvöfalt til þrefalt meira. Sökum þessa fer fiskvinnsla hluta til fram á Suðvesturhorninu en fiskurinn er áfram veiddur fyrir Vestan.

Það er ástæða fyrir því að togararnir sigla með allan aflann suður í stað þess að landa honum á Vestfjörðum. Það er einnig augljós skýring á því hvers vegna aflinn sem landað er í höfnunum fyrir vestan fer beint á markað og þaðan í fiskiðjuverin þar syðra. Hér er lykilatriði málsins – flutningskostnaður er svo mikill að það er betra að fyrir togarana að sigla alla þessa leið eða keyra með hann óunninn. Hvernig stendur á því að nefnd um málefni Vestfjarða afgreiðir flutningsjöfnun með þeim hætti að hún sé eitthvað flókin og jafnvel verri en að gera ekki neitt? Það er óskiljanlegt og vekur upp margar spurningar. En það er ekki of seint að kasta aðgerðarleysinu fyrir borð og taka til við að framkvæma raunverulegar og raunhæfar úrbætur fyrir landið allt. Niðurgreiðsla strandsiglinga gagnast öllu landinu og sérstaklega sjávarplássum sem nú svíða vegna hliðarverkana fiskveiðistjórnarkerfisins og miðstýrðra byggðaaðgerða fyrir Reykjavík.

Flutningskostnaður bitnar auðvitað á öðrum fyrirtækjum sem eru að reyna að standa í atvinnurekstri á svæðinu. Þau hafa svo árum skiptir bent á þetta óréttlæti og þrátt fyrir bættar samgöngur sl. ár er enn langt í land. Fyrirtæki sem gætu hugsað sér að flytja starfsemi sína á svæðið hætta flest við þegar dæmið er skoðað ofan í kjölinn. Fyrirtækin sem fyrir eru hafa bent á þessa staðreynd svo árum skiptir en svo virðist sem rödd þeirra nái alls ekki eyrum stjórnvalda.

Boltinn er hjá stjórnvöldum – ég treysti því að forsætisráðherra spyrji sjálfan sig hvað hafi breyst frá því að fulltrúar allra sveitarstjórna Vestfjarða mættu á fund í byrjun febrúar. Þar voru strandsiglingar/flutningsjöfnun efst á forgangslistanum. Framkvæmi hann tillögur frá sveitarfélögunum auk þess að flytja þau opinberu störf sem nefndin lagði til eru bjartir tímar framundan fyrir Vestan.

Sakleysið

2007-04-25T09:22:00.000Z

Mikið var gaman í gær á tónleikum í Bolungarvík. Ólöf Arnalds, Lay Low og Pétur Pen allt magnaðir listamenn og gáfu okkur frábæra tónleika. Ólöf er samt í algjöru uppáhaldi hjá mér og það kæmi mér ekki á óvart að hún myndi ná verulegum hæðum í framtíðinni. Reyndar hugsaði ég talsvert um viðskipti og tónlist í gær. Nú hafa fjárfestar lagt talsverða peninga í Nylon, Garðar Thor og Silvíu með von um vinsældir og gróða. Þau þrjú sem komu fram í gær eiga hins vegar að mínu mati mun meiri séns á alþjóðahylli en Nylon og Silvía. Silvia og Nylon eru alls ekki léleg atriði en markaðurinn er svo mettaður og lítið pláss fyrir meira af því sama. Það má vel vera að Garðari takist vel upp – ég þekki þann markað ekki nógu vel. Þau þrjú sem komu fram í gær hafa öll talsvert nýtt fram að færa og séu landvinningar okkar Íslendinga á listasviðinu skoðaðir kemur í ljós að listamenn með sérkenni eru þeir sem hafa komist á kortið.

Skriðurnar komu einnig fram í gær og voru frábærar – fyrir utan fremur ljóta konu með skegg sem spilaði á bassa með þeim í gær. Hún var greinilega illa æfð og stóð fyrirmyndinni langt að baki. Skriðurnar söknuðu því sárlega klettsins með gígjuna.

Að lokum. Sá þetta komment á einni bloggsíðunni um minn ágæta vin Dr. Lýð Árnason: Mér virðist Lýður vera einlægur og góð manneskja. En hann kann líka að láta það frá sér. Afslappaður og rólegur. Minnir mig á Björk, sem manneskja meina ég, þetta barnslega sakleysi sem manneskjur bera með sér alla ævina. Ótrúlega flott og einhvernveginn þau eru bara svona af náð og miskunn almættisins.

Jú, er það ekki bara - Lýður og Björk eru alveg eins.....

Meint U-beygja

2007-04-20T14:22:00.000Z

Komst aftur í Staksteina í Morgunblaðinu eftir nokkuð hlé. Þeir hafa greinilega legið yfir skrifum mínum síðustu árin og geymt þau til betri tíma sem er hið besta mál. Meiningin með Staksteinum gærdagsins var greinilega að halda því til haga að ég sé ekki lengur náttúruverndarsinni og eru ummæli mín um olíuhreinsunarstöð notuð því til sönnunar. Sá einhverja einhverja spekúlanta aðra túlka þetta á sama hátt. En hvað sagði ég sem þýðir að ég hafi tekið þessa meintu U-beygju?

Í skýrslunni margfrægu sem kom frá Vestfjarðarnefndinni er djarfasta hugmyndin að setja olíuhreinsunarstöð í Arnarfjörð eða Dýrafjörð. Afar langsótt hugmynd – en verulega djörf. Heft eru við þessa stöð 500 störf – það er ekki vont fyrir fjórðunginn þegar tekin er mið af stöðunni. Hugmyndin er að öðru leyti algjörlega óljós og fullyrðingar um litla mengun og ekki stóriðju hreint ekki á hreinu. Í því ljósi sagði ég eitthvað á þessa leið:

Þegar okkur er boðið eitthvað sem þýðir 500 störf er eðlilegt að skoða kostinn – ekki segja nei án þess að kanna málið. Það er hins vegar hætt við því að fólk fái glýju í augun og vonin um 500 störf geti blindað. Hins vegar er erfitt að sjá slíkt ferlíki fyrir sér (120 hektara) í þröngum fjörðum Vestfjarða.

Þetta er U-beygjan mín í náttúruverndarmálum og túlki þeir sem túlka vilja.....

Lokuð landamæri

2007-04-16T16:22:00.000Z

Merkilegar eru niðurstöður könnunar um málefni innflytjenda sem birtar voru í gær. Þar kemur fram að meirihluti þjóðarinnar og þá sérstaklega hér á NV-svæðinu vill hertar reglur er varðar heimildir útlendinga til að setjast að á Íslandi. Þetta kemur mér ekki á óvart í ljósi þeirrar umræðu sem hefur átt sér stað að undanförnu. Það sem kemur þó á óvart er að 60% þeirra sem styðja VG eru fylgjandi hertari reglum – það kemur mér spánskt fyrir sjónir.

Ég held hins vegar að fæstir geri sér grein fyrir hvað það er í raun erfitt að fá dvalarleyfi á hér á landi. Löggjöfin hér er með þeim strangari sem finnast. Fólk utan evrópska efnahagssvæðisins getur gleymt því að reyna við landamæri Íslands. Flóttafólk sem sækist eftir því að koma til Íslands af mannúðarástæðum hefur aðeins í tilfelli Bobby Fischers fengið landvistarleyfi. Þú verður að vera orðinn 24 ára til þess mega búa á Íslandi með maka þínum – sértu útlendingur en maki þinn íslenskur. Er þetta lin löggjöf?

Þegar stöðunni á Norðurlöndum er blandað saman við stöðuna hér – er ekki farið rétt með staðreyndir. Á Norðurlöndum hefur straumurinn sl. ár aðallega verið flóttafólk frá stríðshrjáðum svæðum og ekki í stakk búið að komast endilega strax á vinnumarkaðinn. Hér á landi snýst dæmið nær eingöngu um farandverkafólk sem kemst strax í vinnu. Að bera vanda Norðurlandanna saman við stöðuna hér er auðvitað ekkert annað en rakalaus þvættingur. Það er erfitt að sjá hvernig við ættum að loka landinu frekar fyrir útlendingum en nú er gert – nema við kjósum að segja upp samningnum um evrópska efnahagssvæðið.

Það þarf svo sannarlega að bæta margt í málefnum útlendinga á Íslandi - hvernig tekið er á móti fólki, hvernig tungumálakennslu er hátta, hvernig kjaramálum er háttað o.s.frv. Það hins vegar hefur ekkert að gera með herta löggjöf.

Mannanafnanefnd

2007-04-13T14:47:00.000Z

Mér fannst skemmtilegt að lesa athugasemd við leiðara ritstjóra Blaðsins frá 11. apríl sl. en hún birtist í Blaðinu í dag. Þar kemur fram á ritvöllinn vörpulegur penni sem heitir því stutta en laggóða nafni Sjálfstæðisflokkurinn. Ekki Andri, Kjartan eða Hanna Birna heldur bara Sjálfstæðisflokkurinn. Ég sem hélt að mannanafnanefnd hafi alla tíð verið nokkuð treg þegar kemur að framúrstefnulegum nöfnum. En það er greinilegt að hér hefur orðið breyting á.

Bassaleikur

2007-04-11T16:18:00.000Z

Ég er miður mín. Fyrir 3 mánuðum sýndi ég Helgu Völu hvernig ætti að snúa bassagítar. Hún náði tón úr honum 3 dögum síðar. Á laugardaginn var kom hún fram með Skriðunum og spilaði flottar línur í góðu grúvi. Ég byrjaði á bassanum fyrir 23 árum - Helga Vala mætti á svæðið og rúllaði mér upp!

Er kannski ekki meira í rusli en svo að ég er ansi ánægður með hana....

Gæti Spandau komið vestur?

2007-04-11T13:48:00.000Z

Hitti mann frá Danmörku um helgina. Kunningja frá mínu fyrra lífi innan tónlistarbransans. Hann sagði mér frá því hvað sonur hans var að bardúsa við þessa dagana. Hann er að leggja lokahönd á verkefni við Kaupmannahafnarháskóla í arkitektúr og er viðfangsefnið fangelsi fyrir stríðsglæpamenn. Þetta var athyglisverð umræða – því það er ekki til neitt sérstakt fangelsi fyrir stríðsglæpamenn sem dæmdir hafa verið til langrar fangelsisvistar. Maður man auðvitað eftir hinu alræmda Spandau fangelsi þar sem Hess sat einn fanga um árabil. Tímarnir hafa breyst og þarfirnar líka. Þeir sem dæmdir eru fyrir stríðsglæpi eru margir hverjir sannfærðir um að þeir hafi verið að gera rétt og þjóna landi sínu. Okkur býður kannski við gjörðum þeirra en hér er ekki um venjulega glæpamenn að ræða.

Ég fór strax að hugsa hvers vegna hið einangraða Ísland tæki ekki boltann og byggði upp fangelsi sem sinna ætti þessum föngum – er það nokkuð vitlausara en hvað annað? Mönnum hefur dottið ýmislegt í hug upp á síðkastið – eins og að setja á laggirnar varalið lögreglu og heimavarnarlið. Væri það ekki ráð að taka slíkt fangelsi í notkun? Mörgum dettur efalaust í hug Miðnesheiðin þegar staðsetning slíks fangelsis er skoðuð en fyrir mér kemur aðeins einn staður til greina: Vestfirðir.

Ég sé ekkert því til fyrirstöðu að unnið sé að því að útbúa Spandau fyrir vestan.

Grjóthrun í Hólshreppi

2007-03-29T09:50:00.000Z

Grjóthrunið hefur verið við upptökur að undanförnu og stefna á landvinninga. Reyndar varð upplausn í bandinu þegar einn limurinn ákvað að elta pólitískar ambisjónir sínar og bjóða sig fram til alþingis. Þetta setti nokkuð strik í þá hlutleysisstefnu sem viðhöfð hafði verið til þess dags. Eftir marga fundi og stranga náðust loks sættir. Þeir sem harðast deildu voru ónefndur bassaleikari og títtnefndur frambjóðandi. Bassaleikarinn vildi meira pönk á meðan frambjóðandinn hugaði að markaðssókn og búningum. Sættin felst í því að frambjóðandinn fær að sitja áfram á sínum lista – þrátt fyrir að hann sé í baráttusæti og allar lýkur á að hann setjist á þing – gegn því að búningar verði lagðir á hilluna og gítarsólóum verði stillt í mikið og gott hóf. Einnig verður hljóðblandað á hlutlausu landi og því haldið í Önundarfjörð til þess at arna. Við þessar málalyktir var hrært í vöfflur og haldið í Rúgbrauðsgerðina þar sem samningar voru undirritaðir.

Hér er svo Eliza Wrona – með aðeins of miklu Dolby fyrir minn smekk en það lagast í Önundarfirðinum.

Furðulegt

2007-03-20T10:54:00.000Z

Sumt er fábreyttum manni eins og mér fyrirmunað að fá nokkurn botn í. Ég tek heilshugar undir þessa yfirlýsingu frá Félagi heyrnarlausra:

Félag heyrnarlausra harmar mjög að frumvarp um viðurkenningu á íslensku táknmáli náði ekki í gegn á þessu þingi. Þetta hefur slæm áhrif á heyrnarlausa í samfélaginu þar sem barist hefur verið fyrir réttindum heyrnarlausa í áratugi. Máli okkar var enn vísað frá við þinglok. Félag heyrnarlausra gefst ekki upp í þessari réttindabaráttu og við vonumst til að fá stuðning í haust.

Stutt samantekt

2007-03-19T15:31:00.000Z

Flutningur opinberra starfa út á landsbyggðina hefur verið í umræðunni að undanförnu. Í samantekt iðnaðarráðuneytisins um þróun opinberra starfa á árunum 1995-2005, vegna fyrirspurnar Önnu Kristínar Gunnarsdóttur, kemur margt athyglisvert fram. Landbúnaðarráðherra ku hafa verið sérstaklega iðinn við kolann og hefur skapað vel á annað hundrað störf í kjördæmi sínu. Gott hjá honum. Öðrum svæðum er flestum afar vel sinnt. Það er þó tvennt sem slær mig í þessari samantekt iðnaðarráðuneytisins: Í fyrsta lagi aumingjaskapurinn í flutningi opinberra starfa til Vestfjarða og í öðru lagi yfirlit yfir hve mörg opinber störf urðu til á höfuðborgarsvæðinu á sama tíma. Opinberum störfum á Vestfjörðum hefur fjölgað um heil 6 frá árinu 1995. Það verður að teljast afleitur árangur.

Alverst í þessum málum er þó undarlegur flutningur opinberra starfa frá svæðinu til höfuðborgarinnar. Slíkar aðgerðir eru gjarnan vel faldar og þurfa ekki alltaf að liggja í því að opinbert starf er lagt niður á viðkomandi stað. Það er nefnilega þannig að ýmsir einkaaðilar hafa sinnt opinberum stofnunum út um allt land. Þannig hafa bókhalds- og endurskoðunarfyrirtæki sinnt heilbrigðisstofnunum á Ísafriði og í Bolungarvík um langt árabil. Nú hefur því verið breytt og þessi störf flutt til ríkisendurskoðunar. Þetta er stórmerkilegt og tel ég víst að engar krónur hafi sparast með þessari aðgerð – líklega hefur kostnaðurinn aukist. Þetta gerist á sama tíma og ratsjárstöðin á Bolafjalli flyst að mestu á Miðnesheiðina og með henni 9 stöðugildi. Bakvinnsla sem áður fór fram á Ísafirði fer nú fram hjá Reiknistofu bankanna. Velta Sparisjóðs Vestfirðinga minnkaði um 700 milljónir við þessa arfavitlausu aðgerð.

Til þess að ramma það inn í eitt skipti fyrir öll að Vestfirðir eru ekki baggi á þjóðinni er hollt að enda á eftirfarandi samantekt:

Aflaverðmæti á svæðinu: tæpir 6 milljarðar á ári
Útflutningsverðmæti: 10 milljaðrar á ári.
Tekjuskattar einstaklinga: 3.5 milljarðar
Hagnaður vestfirskra banka árið 2006: 1 milljarður.
Fjármagnstekju- og fyrirtækjaskattar: ekki ljóst en umtalsverðar upphæðir þar sem á svæðinu eru rekin blómleg fyrirtæki og talsverður fjöldi lifir á fjármagnstekjum eingöngu.

Það er rangt að halda því fram að Vestfirðir séu illa rekið svæði. Verðmætin sem stöndug og framsækin fyrirtæki skila þjóðarbúinu eru langt umfram það sem svæðið tekur úr ríkiskassanum á móti. Vöruskipti við útlönd eru jákvæð á Vestfjörðum en opinberar framkvæmdir eru á sama tíma í algjöru lámarki.

Ég er algjörlega með strandsiglingar á heilanum og lýk máli mínu alltaf á þeim. Hafnirnar sem skapa m.a. þessi gríðarlegu verðmæti hafa þurft að horfa á annarri af tveimur tekjulindum sínum sem eru útflutningstekjur. Með beinni aðgerð ríkisins var komið stoðum undir stærstu höfn Íslands sem eru Faxaflóahafnir. Útflutningur fer að langmestu leyti um þessa höfn þrátt fyrir að verðmætin séu sköpuð í 400-1000 km. fjarlægð frá höfninni. Þetta gerði ríkið með því að niðurgreiða landflutninga þannig að strandsiglingar lögðust af. Hvað ætli Faxaflóahafnir hafi grætt á þessari “byggðaaðgerð” ríkisins?

Núll og nix

2007-03-16T11:03:00.000Z

Af hverju ekki kynlíf með Zero forleik? Spyr Vfífilfell og eru bara svona ljómandi hressir. Þeir botna ekkert í móðursjúku vælukjóunum sem finna að þessum orðum.

Stefán Torfi Sigurðsson hjá Vífilfelli segir :

Það er afturhvarf til fortíðar í tíðarandanum þessa stundina. Mér finnst þurfa svolítið góðan vilja til að sjá eitthvað hroðalegt út úr þessu slagorði. Slagorðin í herferðinni eru öll í þessum gír: Af hverju ekki að snúa sér beint að kjarnanum og ekkert vesen.

Af hverju ekki að snúa sér að kjarnanum og ekkert vesen? Það þarf nú ansi góðan vilja til þess að mislíka ekki slíkar orðsendingar í tengslum við kynlíf. Tíðarandi sem byggir á því að ganga allt af einu skrefi lengra í dag en í gær er heldur ömurlegur enda held ég að fólk sé almennt ekki á bylgjulengd Vífilfells í þessum efnum.

Má ég þá heldur biðja um langan forleik með malti og appelsíni....ekkert Zero takk!

Steingrímsfjarðarheiði

2007-03-12T13:25:00.001Z

Steingrímsfjarðarheiði er heiði sem mér er ekkert sérstaklega vel við. Vond heiði að fara yfir – veður oft válynd. Lenti í hremmingum þar fyrir viku – velti bílnum með dýrmætan farm innanborðs. Er óendanlega feginn að hafa sloppið með skrámur og börnin mín algjörlega heil. Þakka líka fyrir að gott fólk kom innan við 20 mínútum eftir óhappið þar sem símasambandslaust er á heiðinni. Botna ekkert í því Steingrímsfjarðarheiði skuli ekki hafa verið efst á forgangslistanum varðandi GSM senda á fjallvegi landsins. Holtavörðuheiðin er núna komin í samband, sem er gott, en munurinn á Steingrímsfjarðarheiði og Holtavörðuheiði er að sú fyrrnefnda er fáfarnari. Þar af leiðir getur fólk þurft að bíða lengur eftir hjálp þar en á t.d. Holtavörðuheiðinni. Hefði ekki verið skynsamlegt að tengja fyrst fáfarnari heiðar?

Óttinn

2007-03-09T18:45:00.000Z

Óttinn er við völd. Fyrirtæki og stjórnendur þeirra eru þessa dagana áberandi í óttaumræðunni. Ef við fáum ekki að stækka þá förum við. Ef við getum ekki gert allt upp í evrum þá förum við. Ég get vel skilið að fyrirtæki þurfi að auka hagnað sinn og bæta afkomu sína. En mér finnst harla aumingjalegt að hóta hinu og þessu ef menn fái ekki þetta eða hitt......

Aftur og enn

2007-03-08T15:52:00.000Z

Gunnar Þórðarson sendir mér tóninn hér á Bæjarins besta vegna skrifa minna um strandsiglingar. Hann segir mig vera illa upplýstan og dregur í efa ýmislegt sem ég lagt fram. Það er vissulega rétt hjá Gunnari að Marco Polo snýst um að koma flutningum af vegum yfir á sjó. Það er einmitt það sem ég er að benda á í mínum skrifum. Við eigum rétt eins og Evrópusambandsríkin í stórkostlegum vanda með stóra flutningabíla á vegum landsins. Vegakerfi okkar er rétt eins og vegakerfi Evrópu löngu sprungið – þrátt fyrir aðrar forsendur. Það má vel vera að erfitt hefði verið fyrir okkur að taka þátt í Marco Polo en það er afleitt hversu lítið það var kannað og að fyrirframgefnar úrtölur misupplýstra manna réðu þar úrslitum.

Gunnar Þórðarson hefur ofurtrú á frjálshyggju og markaðslausnum. Hann trúir því að með því að efla vegakerfið lækki flutningskostnaður og þá muni horfa til betri vegar. Þetta er að nokkur leyti rétt en þó verulega gölluð hugmynd. Fyrirtæki og einstaklingar á Vestfjörðum þurfa að brúa bilið þangað til bundið slitlag verður komið á Arnkötludalinn. Það er afleitt að hafna aðkomu ríkisins að strandsiglingum með frjálshyggjurökum við þær aðstæður sem nú eru uppi. Þungatakmarkanir, vondir vegir og slæmt veður setja stöðugt strik í reikninginn og takmarkar möguleikana til vaxtar á svæðinu.

Það sem eyðileggur vegina okkar er þungi. Þetta þýðir með öðrum orðum að einn flutningabíll með 11,5 tonn í öxulþunga brýtur niður vegina í einni ferð jafn mikið þúsundir fólksbíla sem aka sömu leið. Þegar Vegagerðin er að reikna út slit vega er slit fólksbifreiða ekki tekið með í reikninginn því slit af þeirra völdum er svo hverfandi miðað við flutningabifreiðar.

Sú fullyrðing að landflutningar séu niðurgreiddir byggist ekki síst á þessum staðreyndum; flutningabílar greiða ekki gjöld til viðhalds vega í samræmi við það slit sem þeir valda að frátaldri þeirri hættu á slysum sem þung umferð þeirra veldur á vegunum. Nú stendur íslenskt samfélag frammi fyrir því að nauðsynlegt er talið að verja um 100 milljörðum króna til viðhalds vega. Þungaflutningar um vanþróað þjóðvegakerfi eiga stærstan þátt í að sú þörf er til staðar. Fram hjá því getur Gunnar Þórðarson ekki litið.

Það er mér ráðgáta hvaða málstað Gunnar er að verja í skrifum sínum. Hann segir m.a.:
Hins vegar hafa hafnir landsins verið stórkostlega niðurgreiddar af ríkinu í gegnum árin en breyting verður á því á þessu ári. Það er vegna kröfu um samkeppni sem komin er til af samningum okkar um evrópskt efnahagsvæði. Fullyrðingar um að hafnir landsins séu niðurgreiddar meira en vegir landsins eru út í hött. Það er alrangt að samningur okkar um evrópskt efnahagssvæði setji okkur þær skorður að hafnarsjóður Þórshafnar og hafnarsjóður Antverpen séu fyrirtæki í sambærilegum rekstri. Það er ekkert sem bannar það að hafnir landsins, rétt eins og þjóðvegir landsins, sé viðhaldið af ríkinu. Evrópusambandið bannar íslenska ríkinu ekkert í tengslum við hafnirnar en grandvaraleysi okkar og vanþekking veldur því að við tókum upp arfavitlaus lög sem gera flestum höfnum landsins erfitt fyrir.

Hafnirnar á Íslandi eru undirstaða byggðar í landinu – hvort sem horft er til Reykjavíkur eða Súðavíkur.

Sturlu svarað

2007-03-08T15:50:00.000Z

Sturla Böðvarsson kýs að fara heldur neikvæða leið í svörum sínum við grein minni um strandsiglingar og Evrópusambandið. Í viðtali sem birtist í Bæjarins besta þann 2. mars sl. segir Sturla:

Grímur bæjarstjóri virðist hinsvegar hafa meiri áhuga á að slá pólitískar keilur og berja á stjórnvöldum en leita leiða sem eru færar. Tilvísanir til hugmynda frá fulltrúa sveitarfélaganna í Brussel stoða lítt þegar þær eru byggðar á misskilningi eða rangfærslum eins og fram hefur komið í fullyrðingum Gríms Atlasonar. Flutningskostnaður verður ekki lækkaður með því einu að slá lyklaborðið á tölvu bæjarstjórans í Bolungarvík og breiða út misskilning sem er til þess gerður að vekja óraunhæfar væntingar.

Rökþrota ráðherra
Mér þykir leiðinlegt að samgönguráðherra eigi ekki önnur svör en þau að reyna að gera lítið úr mér og þeim staðreyndum sem ég tel mig hafa rökstutt með ágætum hætti. Flutningskostnaður verður ekki lækkaður með tölvuslætti mínum – það er rétt – en kannski verður hann til þess að menn hætta að halda hinu og þessu fram sem er ósatt. Á meðan sveitarstjórnarmenn leggja hausinn í bleyti og benda á leiðir rýkur samgönguráðherra upp og hreytir ónotum í menn og segir þá fara með fleipur. Þetta er ómerkilegt. Við sem búum og störfum í landsfjórðungnum sem Sturla er þingmaður fyrir höfum áhyggjur af ástandinu og það hefur ekkert að gera með lit pólitískra skoðana. Mér sýnist ráðherrann vera með öllu rökþrota.

Sturla sakar mig einnig um að leita ekki leiða heldur aðeins gagnrýna. Þetta kemur úr hörðustu átt. Leiðirnar sem eru færar eru mýmargar og hefur undirritaður bent á nokkrar ásamt því að mæta með öðrum forystumönnum sveitarfélaganna á Vestfjörðum á fund ríkisstjórnarinnar þar sem margar leiðir voru kynntar. Staða margra fyrirtækja á Vestfjörðum er með þeim hætti að 30-60% aukinn flutningskostnaður er of stór biti til að kyngja þó vissulega horfi til betri vegar á hluta svæðisins eftir 3 ár. Þá eiga samgöngur á landi að vera orðnar skaplegar. Ríkisstjórnin afrekaði það þó að seinka bundnu slitlagi um 1 ár með umdeildum þensluletjandi aðgerðum sl. haust. Hár flutningskostnaður er staðreynd og það er gott að fá það á hreint að Sturla Böðvarsson ætlar ekki að gera neitt til þess að brúa bilið þangað til að samgöngur á landi verða viðundandi.

Marco Polo II
Sturla segir Marco Polo áætlunina vel kynnta hér á landi – ég spyr á móti hvers vegna er Marco Polo II ekki búin að vera á dagskrá sem kynningarherferð á vegum samgönguráðuneytisins sl. misseri? Áætlunin tekur til áranna 2007 til 2013 og getur ef rétt er haldið á spilunum skipt byggðir landsins miklu máli. Það hefði mátt sækja styrk til Evrópu fyrir allt að 35% af kostnaðinum. Það er kannski rétt hjá Sturlu að sveitarfélögin og skipafélögin hefðu átt að vinna málið sjálf. En ég geri þá kröfu til ríkisstjórnar Íslands að hún gæti hagsmuna alls landsins og haldi okkur öllum vel upplýstum. Það er starf ráherrans hverju sinni nema ef vera skyldi að fólksfækkun og erfiðleikar byggðarlaga séu það sem er á stefnuskrá ráðherrans – sem ég trúi ekki. Svona til glöggvunar á Marco Polo II má benda á eftirfarandi vefslóð: http://ec.europa.eu/transport/marcopolo/faq/doc/faq.pdf.

Það er enginn að tala um að taka upp rekstur ríkisskipa aftur heldur er aðeins verið að benda á stuðning við strandsiglingar þann tíma sem halli er á flutningum. Forsvarsmenn Atlantsskipa hafa einnig bent á áhugaverða leið en Sturla kýs að hafna þeim alfarið. Hvernig ætli standi á þessum þvergirðingshætti?

Hafnir og hafnarlög
Fyrst ég er kominn á skrið er ekki úr vegi að líta á vægast sagt undarleg hafnarlög sem tóku gildi fyrir nokkrum árum. Þar er gert er ráð fyrir að hafnir landsins séu sjálfbærar og standi undir rekstri með gjaldskrá. Tilskipanir frá Evrópu hafa verið nefndar sem helsta ástæða þessara nýju laga. Hafnir landsins eru í samkeppnisrekstri og settar á bás með stærstu höfnum Evrópu. Þannig eiga hafnir eins og Raufarhöfn og Þórshöfn að berjast um trillurnar. Þetta er auðvitað fásinna og með öllu óskiljanlegt. Mig grunar reyndar að þegar þessi lög voru smíðuð hafi sama vanþekkingin á málefnum Evrópu verið upp á teningnum og þegar Ísland kokgleypti raforkutilskipunina fyrir nokkrum árum. Sú tilskipun átti við um allt aðrar aðstæður en þekkjast á Íslandi og auðveldlega hefði mátt komast hjá því að innleiða hana hér á landi.

Dæmi um hve undarlegur samanburðurinn er má sjá á eftirfarandi dæmi. Bolungarvíkurhöfn þarf á þessu ári að endurnýja þekju og stálþil fyrir tæpar 150 milljónir kr. Hafnarsjóður Bolungarvíkur greiðir 40% af kostnaði við stálþilið og 30% af þekjunni og greiðir ríkissjóður afganginn. Hafnarsjóður Bolungarvíkur veltir rúmum 30 milljónum kr. árlega og getur klárlega ekki fjármagnað slíkar breytingar án þess að steypa sér í skuldir. Til samanburðar hefur Antwerpenhöfn undanfarin ár staðið í miklum lagfæringum á viðleguköntum og þekju. Kostnaðurinn er um tæpir 60 milljarðar kr. og er ýmist greiddur 60% af ríkinu eða að fullu. Antwerpenhöfn er ein af stærstu höfnum í heimi velta hafnarinnar árið 2005 var yfir 90 milljarðar kr. Höfnin skilaði hagnaði upp á rúma 3 milljarða kr. árið 2005. Antwerpenhöfn er samt ekki ætlað að standa undir öllum rekstri og viðhaldi af hafnargjöldunum einum saman.

Það er með ólíkindum hvernig stjórnvöldum tekist að setja stein í rekstur sveitarfélaganna í landinu með furðulegum lögum og reglugerðum sem eiga hingað ekkert erindi. Ég vona að ríkisstjórn Íslands sjái að sér og jafni flutninga til og frá Vestfjörðum án tafar. Fjórðungurinn getur ekki beðið næstu 3 ár – það er of langur tími.

Bóklærð frjálshyggja úr tengslum við raunveruleikann

2007-02-28T12:28:00.000Z

Á meðan Samskip og Eimskip sjá sér engan hag í að sigla með vörur á Íslandi, njóta félögin gríðarlegrar velvildar og niðurgreiðslna á flutningaleiðum í Evrópu. Í sérstakri móttöku í Hollandi fyrir tæpu ári, þar sem Samskip kynnti stefnu sína til framtíðar, fór ekki á milli mála hvaða augum Karla Peijs, þáverandi samgönguráðherra Hollands, lítur strandsiglingar:

„Í Hollandi búum við við gífurlegt álag á vegarkerfinu og miklar umferðarteppur, “ segir hún og kveður ríkisstjórnina styðja dyggilega við þá þróun að flutningar færist í auknum mæli yfir í skip þannig að ávallt sé farin skemmsta leið á áfangastað landleiðina. Þá upplýsti hún að ríkisstjórnin hefði eyrnamerkt 10 milljónir evra til nýsköpunar í sjóflutningum á skemmri leiðum. „Þetta er í samræmi við sértakt átak Evrópusambandsins.Milljóna tonna álagi hefur þegar verið létt af hollenskum vegum og fyrir það erum við þakklát,” segir hún. (Fréttablaðið 2006)

Á Íslandi lemja menn hausnum við steininn. Samgönguráðherra og aðrir halda því statt og stöðugt fram að strandsiglingar séu ekki hagkvæmar og ekki megi niðurgreiða þær. Þetta er alrangt og það er sorglegt að horfa á glötuð tækifæri. Ef Marco Polo áætlunin er nefnd er fullyrt að Íslendingar geti ekki sótt um styrki til strandsiglinga. Rökin eru þau að einungis megi sækja um styrki til siglinga á milli landa. Hefur þetta verið kannað til hins ýtrasta? Nei, það er bara fullyrt. Ég fullyrði á móti að hægt hefði verið að sækja um 35% styrk fyrstu 3 ár siglinga á leiðinni Ísafjörður, Patreksfjörður, Reykjavík – Evrópa (Rotterdam, Hamborg). Síðan hefði mátt sækja um styrk vegna jaðarsvæða í gegnum aðrar áætlanir Evrópusambandsins. Nú, ef það er svo slæmt að Evrópusambandið hafnaði umsóknum okkar þá gæti ríkissjóður styrkt þessa flutninga þann tíma sem jafnvægi og eðlileg markaðsstaða kæmist á. Það er þannig ekkert sem kemur í veg fyrir að við borgum strandsiglingar niður.

Hafnir landsins og ný hafnarlög eru annað dæmi um undarlega túlkun ráðamanna á Íslandi á regluverki Evrópusambandsins. Að setja hafnir á Íslandi í sama flokk og hafnir í Þýskalandi, Hollandi, Belgíu og fleiri landa er óskiljanlegt. Að ætlast til þess að hafnargjöld standi undir öllum framkvæmdum við hafnir á Íslandi er fráleitt. Ein stærsta höfn í heimi er Antverpen höfn í Belgíu. Þar er verið að endurnýja stálþil og viðlegukanta fyrir milljarða. Antverpenhöfn borgar minnst að þessum framkvæmdum. Ríkissjóður Belgíu greiðir þorra framkvæmdarinnar. Smáhafnir á Íslandi þurfa að punga út 40% úr galtómum sjóðum sínum í nafni samkeppni. Þetta er auðvitað ekkert annað en hlægilegt!

Það er hneyksli að slíkum slembirökum skuli vera beitt sem tíðkast hafa gagnvart Evrópusambandinu og regluverki þess. Það er kominn tími til að ráðamenn horfi upp úr stöðluðum bókum um frjálshyggju og kynnist raunveruleikanum.

Strandsiglingar - ölmusa eða þjóðþrifamál?

2007-02-26T12:52:00.000Z

Fyrir 25 árum sigldu Heklan og Esjan hringinn í kringum landið og færðu landsmönnum vörur. Verslun dafnaði í byggðum landsins og fyrirtæki áttu þess kost að setja upp höfuðstöðvar og starfsstöðvar annar staðar en á höfuðborgarsvæðinu. Með bættum vegum og markaðsvæddara þjóðfélagi færðust þessir flutningar á vegi landsins. Sjóflutningar lögðust af. Nú er svo komið að um vegi landsins þeysa trukkar með hundruð tonna af varningi dag hvern. Vegirnir láta á sjá og hættur fylgja þessum flutningum. Það sér það hver maður að þröngir malarvegir á Vestfjörðum eru ekki beinlínis kjörsvæði 18 hjóla vöruflutningabíls með tengivagn – svo ekki sé minnst á að vetrarlagi.

Marel og byggðaþróunin

Þetta er ein hlið málsins. Hin hliðin eru áhrifin á byggðarþróun í landinu. Flutningskostnaður er meiri á ákveðnum svæðum landsins en öðrum. Þannig búa Vestfirðingar við 30-40% hærri flutningskostnað en t.d. Akureyringar. Auk þess er öxulþungi oft takmarkaður sem rýrir flutningsgetuna umtalsvert. Möguleikar fyrirtækja, sem framleiða vörur, eru takmarkaðir við slíkar aðstæður. Þetta leiðir af sér einhæfni í atvinnulífinu sem aftur þýðir brothætt umhverfi. Þetta sést best á nýlegum fréttum þess efnis að Marel muni loka starfsstöð sinni á Ísafirði í haust. Tekin var ákvörðun um að draga saman í rekstri og stækka einingar. Einingin á Ísafirði átti aldrei möguleika í kapphlaupinu um að vera einingin sem myndi stækka. Það myndi aldrei svara kostnaði að keyra afurðirnar á vöruhótelin í Sundahöfn. Útflutningshöfnin Ísafjörður var aflögð þegar skipafélögin fóru á vegina.

Rangt að ESB banni styrki til strandflutninga

Stjórnvöld hafa keppst við að auglýsa eftirlitsstofnun EFTA (ESA) og tilskipanirnar frá Brussel þegar kemur að strandsiglingum. Með því að telja okkur trú um að þessar stofnanir banni stjórnvöldum hér á Íslandi að koma að slíkum flutningum hefur þeim tekist að koma í veg fyrir löngu tímabærar aðgerðir í þessum efnum. En við skulum í eitt skipti fyrir öll eyða goðsögninni um að Evrópusambandið og EES samningurinn komi í veg fyrir og banni íslenskum stjórnvöldum að niðurgreiða strandsiglingar. Það eru beinlínis til kaflar í bókmenntum Evrópusambandsins og viðaukum með EES samningnum sem snúast um styrkingu strjálbýlla svæða. Ísland og Norður-Noregur eru þar tekin út fyrir sviga sem sérstakt viðfangsefni. Norðmenn hafa um árabil styrkt Hurtigrutan sem keppir við járnbrautir, vegi og flug um vöruflutninga frá Bergen til nyrstu bæja Noregs. Evrópusambandið er með sérstaka áætlun í gangi sem miðar að því að koma flutningum af vegum yfir á járnbrautir og fljót.

Óforsvaranlegt ástand á vegum

Hvernig má það vera að Vestfirðir og önnur svæði þar sem stjórnvöld hafa verið jafn lengi að ljúka við vegabætur og raun ber vitni þurfa að búa við þetta ástand? Það getur ekki verið í hag þjóðarinnar að íbúar á þessum svæðum þurfi að greiða meira fyrir vörur en aðrir landsmenn. Það er líka óforsvaranlegt að bjóða þessum vegslóðum upp á flutningabíla af slíkri stærðargráðu – það býður hættunni heim. Hvað veldur því að ekki er hlustað á almenning í þessu landi þegar kemur að strandsiglingum? Það er alveg ljóst að meirihluti þjóðarinnar, hvort sem hann býr á höfuðborgarsvæðinu eða utan þess, er hlynntur því að taka upp flutninga á sjó.

Fólkið vill breytingar – stjórnvöld ekki

Fyrirtæki í sjávarútvegi á Vestfjörðum hafa lagt fram metnaðarfulla áætlum um það hvernig mætti koma slíkum siglingum á með stuðningi stjórnvalda fyrstu 3 árin. En eftir þann tíma yrði komið jafnvægi á flutningana og ríkisstyrkur aflagður. Áhugavert er að heyra í framkvæmdastjóra Atlantsskipa, Gunnari Bachmann, þegar hann er spurður um ástæður þess að ekki skuli vera komnar á strandsiglingar í viðtali við Bæjarins Besta þann 22. febrúar sl.: „Það vantar enn viljann til að breyta“ segir Gunnar Bachmann, framkvæmdastjóri Atlantsskipa, aðspurður um strandsiglingar fyrirtækisins til Vestfjarða. Hann segist hafa merkt áhuga hjá fyrirtækjum, en það sé eins og tryggð við flutningafyrirtækin sem fyrir eru á markaðinum séu honum yfirsterkari. Mestan áhuga segist Gunnar skynja hjá hinum almenna borgara sem gjarnan vilji losna við öra umferð flutningabíla af vegum landsins en áhuginn hjá stjórnvöldum sé hins vegar ekki fyrir hendi.

Fullyrðingar um hið gagnstæða
Gunnar Þórðarson skrifaði grein í Bæjarins Besta þann 24. febrúar þar sem hann heldur hinu gagnstæða fram. Hann segir strandsiglingar ekki breyta neinu í stóru myndinni – flutningar eigi að fara fram á vegum: Í nefndaráliti um þróun flutninga innanlands sem gefin var út af Samgönguráðuneytinu í apríl 2005 kemur fram að þjóðhagslegur kostnaður myndi hækka við færslu hluta flutnings frá Ísafirði til Reykjavíkur af þjóðvegum út á sjó, sem byggir á hversu lítið magn er verið að flytja. Það er rétt að kostnaður við standsiglingar er talsverður en það er líka verið að fara fram á ríkisstyrktar strandsiglingar á meðan þjóðvegir verða byggðir upp.

Gunnar fer einnig hörðum orðum um þá sem benda á Evrópusambandið og EES samninginn máli sínu til stuðnings. Gunnar segir: Að stjórnandi fyrirtækis eins og Atlant[s]skipa skuli slá um sig Hvítbók og merkilegum markmiðum Evrópusambandsins, til að knýja fram ríkisstyrk til siglinga á Íslandi er ótrúlegt lýðskrum. Gera lítið úr merkilegri samgönguáætlun þar sem Vestfirðingar eru að fá á skömmum tíma miklar vegabætur sem í raun eru langt umfram efnahagsleg rök. Þarna blandar Gunnar saman þeim heimildum EES samningsins um að styrkja strjálbýl svæði annars vegar og markmiðum Evrópusambandsins um að koma flutningum á ár og járnbrautir hins vegar. Hvoru tveggja má nota sem rök fyrir því að færa flutninga aftur á sjó hér við land en helstu rökin eru auðvitað þau að þannig verði jafnara gefið. Samgönguáætlun er ágæt út af fyrir sig – en 2-3 ára bið eftir bundnu slitlagi frá Ísafirði til Reykjavíkur, lengri bið á suðurfjörðum og enn lengri bið þangað til svæðin verða tengd – er of langt bil sem verður að brúa.

Það hallar á Vestfirði

Byggðastefna snýst fyrst og fremst um pólitískar ákvarðanir er lúta að þjónustustigi. Réttlát byggðastefna miðar að jafnri aðstöðu fólks, óháð búsetu. Það er alveg ljóst að Vestjarðasvæðið skilar gríðarlegum virðisauka til samfélagsins. Útflutningsverðmæti og skatttekjur af svæðinu eru margir milljarðar árlega og þessum fjármunum verður að veita aftur í svæðið. Það er búið að koma því þannig fyrir að allar vörur fara til Reykjavíkur en slíkt er ekkert lögmál. Hagur okkar Íslendinga er ekki aðeins að þenja út Faxaflóahafnir heldur að styrkja byggð í þessu landi. Það liggja fyrir málefnalegar og raunhæfar tillögur sveitarfélaga, fyrirtækja og einstaklinga sem stjórnvöld eiga að sjá sóma sinn í að koma til leiðar. Að niðurgreiða strandsiglingar um 100 milljónir árlega næstu 3 árin er ekki ölmusa heldur þjóðþrifamál. Á tungu kauphallarinnar heitir það að vera þjóðhagslega hagkvæmt!

Útboð - var engin frestun?

2007-02-23T12:54:00.000Z

Í haust var svokölluð sýndarfrestun á útboðum ríkisins. Þessi frestun átti að slá á þenslu í þjóðfélaginu. Vestfirðingar mótmæltu og sögðust ekki kannast við þessa þenslu sem allir væru að tala um. Ríkisstjórnin fullyrti að engum framkvæmdum yrði frestað. Það stóð til að bundið slitlag yrði komið árið 2008 - þessu var haldið fram fyrir og eftir frestun. En svona hljóðar útboð á svokölluðum Tröllatunguvegi sem er forsenda bundins slitlags til Reykjavíkur frá norðanverðum Vestfjörðum:

Tröllatunguvegur (605), Vestfjarðavegur - Djúpvegur
Vegagerðin óskar eftir tilboðum í gerð nýs Tröllatunguvegar (605). Verkið felst í gerð nýs vegar frá Vestfjarðavegi (60) í Geiradal, um Gautsdal, Tröllatunguheiði og Arnkötludal að Djúpvegi (61) í Steingrímsfirði. Lengd útboðskaflans er um 24,5 km.

Verki skal að fullu lokið fyrir 1. september 2009.

Er þetta ekki 1 árs frestun - tja, spyr sá sem ekkert veit.....

Ástæðan fyrir tapinu

2007-02-19T12:44:00.000Z

Auðvitað vann Dr. Gunni ekki Júróvisijón forkeppnina. Það vantaði allan þokka í þetta og botn. Ef hann hefði hins vegar gert það eina skynsama í stöðunni og haft mig á sviðinu á bassa, Kristján Hnífsdæling á trommur, Gumma Dórahermanns á gítar, Heiðu á röddum og sjálfan sig á úkalele - hefði lagið steinlegið í netinu. Lagið hefði hljómað nákvæmlega eins en þegar ég og Gummi hefðum farið úr að ofan hefði þjóðin sprengt símakerfið! Þetta sjá allir sannir stílistar. Hefði jafnvel mátt klæða okkur upp í Múmíngalla til að ramma þetta ennfrekar inn......Jamm, þjóðin hefði gengið af göflunum.....

Hið galna

2007-02-16T11:24:00.000Z

Í fyrra birtu nokkur trúfélög auglýsingu í Morgunblaðinu þar sem þeir, sem einhverra hluta vegna hefðu aðhyllst kynvillu, var bent á leið út úr ógöngunum. Þessi leið var samkvæmt þeirra hugmyndum vegur drottins. Þessi trúfélög auglýstu þarna lækningu við krankleikanum samkynhneigð. Mér var mjög í nöp við þessa auglýsingu og taldi að hún væri á brún ærumeyðinga og hefði þannig mátt ritstýra frá birtingu. Ég talaði um þetta við ritstjóra Morgunblaðsins sem var ekki sama sinnis og ég.

Núna eru umræður miklar um Kastljósþátt þar sem Alan nokkur Chambers lýsti afhommun sinni. Ég veit ekki hvort ég vilji ganga svo langt að segja að þáttur eins og þessi flokkist undir ærumeyðingar en þetta er ekki fallegt sjónvarpsefni. Þetta hefur ekkert með upplýsta umræðu að gera. Kynhneigð þvæst ekki af fólki frekar en húðlitur. Vissulega eru til dæmi um menn sem hafa breytt sér - eins og t.d. Michael Jackson en það sést kannski einmitt best á því dæmi hvað erfitt er að hrófla við sköpunarverkinu.

Það að fjalla um kynhneigð fólks á þeim nótum að það sé vilji guðs að við séum svona en ekki hinseginn flokka ég sem þvælu og ekki boðlega á disk vitiborinna manna. Rökin eru brjálæðisleg og að mínu mati stjórhættuleg. Á sama svæði eru t.a.m. umræðan um að svart fólk sé heimskara en hvítt fólk - enda komi það fram í fjölmörgum rannsóknum. Þetta er auðvitað algjörlega galið.....

Göngudeild og greiningarstöð

2007-02-15T08:52:00.000Z

Það er svo langt síðan ég tók þátt í meðferðarumræðunni. Það er svo margt í ólagi - skemmdi maturinn var líka á dagskrá 2001. Það eru 6 ár síðan og menn undrandi. Er ekki tími til kominn að taka kerfið allt í gegn? Eru menn alveg jafn vissir í sinni sök þegar þeir skjóta niður hugmyndir um greiningarstöð og öflugri göngudeildarúrræði? Af hverju má ríkið ekki reka öflugt úrræði fyrir langt genga vímuefnaneytendur? Hvað með börnin? Gæti verið að börn fengju betri úrlausn sinna mála annar staðar en á Vogi?

Vonandi verðum við ekki í sömu sporum eftir 6 ár.

Meðferð og flokkar

2007-02-11T00:54:00.000Z

Einhver kynjavera sem kallar sig Marglitta setti inn athugasemd hér á síðuna um meðferðarmál og tengdi við stjórnarsetu hverju sinni. Meðferðarpólitík á Íslandi hefur löngum verið þverpólitísk. Mér gekk t.a.m. betur með að sannfæra Hjálmar Árnason um ágæti hugmynda minna um greiningarstöð en marga samflokksfélaga mína í VG á sínum tíma. Byrgið er ekki aðeins ábyrgð Framsóknarflokksins eða Sjálfstæðisflokksins heldur allra þeirra sem sitja á alþingi. Fjárlaganefnd og alþingi hafa samþykkt framlög öll þessi ár og félagsmálanefnd og aðrar nefndir þingsins ekki gert neinar athugasemdir við alla þá meðferðarstaði sem hafa risið eins og gorkúlur um allt land - fyrir fólk á öllum aldri.

Breiðavík er áminning - verðum að bregðast við og skera upp. Börn hafa sjaldnast eitthvað að gera inn á meðferðarstofnanir.

Krónufréttir á ljóshraða

2007-02-09T15:53:00.000Z

Merkilegt hvað heimurinn er eitthvað breyttur. Hér áður fyrr voru hinir vísu menn langskólagengnir vísindamenn eins og þeir Jón Helgason eða Sigurður Norðdal. Þetta voru mennirnir sem komu með gullkornin sem í var vitnað í fjölmiðlum. Á þessa menn var hlustað – þeir höfðu eitthvað að segja. Í dag hefur þetta breyst. Núna er varla hlustað á þá sem ekki geta komið boðskap sínum áleiðis á innan við 15 sekúndum. Vægi fréttarinnar eykst mikið ef viðmælandinn er ríkur.

Ég las á mbl.is áðan að krónan muni hverfa með tímanum. Það er Sigurður Einarsson kenndur við Kaupþing sem sagði þetta. Hann er mjög ríkur og fyrirsögnin er mjög góð. Þessi frétt verður örugglega í öllum öðrum fjölmiðlum í dag og næstu daga. Jafnvel efni í Kastljósið eða Morgunútvarpið. Jón Helgason hefði aldrei sagt okkur fréttir af slíku hjómi. Mér þykir krónufréttin heldur innatóm þegar ég les fyrsta erindi Áfanga Jóns:

Liðið er hátt á aðra öld;

enn mun þó reimt á Kili

þar sem í snjónum bræðra beið

beisklegur aldurtili;

skuggar lyftast og líða um hjarn

líkt eins og mynd á þili;

hleypur svo einn með hærusekk,

hverfur í dimmu gili.

Meðferð og börn

2007-02-07T13:22:00.000Z

Óhuggulegar og óþægilegar staðreyndir um Breiðavík hafa dunið á okkur að undanförnu. Þar áður var það Heyrnleysingjaskólinn og síðan auðvitað Byrgið. Við vonum auðvitað að ekkert slíkt eigi sér stað á stofnunum okkar í dag. En getum við verið viss? Það sem kom fram í Kastljósinu sýndi fram á að ofbeldið átti sér einkum stað í frímínútum (á kvöldin og um helgar). Ég efa það stórlega að ráðgjafar á Vogi, Háholti, Árvöllum (Gunnarsholti) o.fl. stöðum beiti börn ofbeldi. En hvað gerist í frímínútum – á kvöldin og um helgar? Hver rannsakar árangur og afdrif barna sem hafa runnið í gengum þessar stofnanir síðustu ár? Erum við alltaf að hjálpa með því að safna börnum saman sem eiga erfitt á einn stað – getur verið að slík ráðstöfum gerir illt verra?

Ég las margar rannsóknir um þessi efni þegar ég starfaði innan geirans. Ein þeirra sló mig hvað mest. Það var rannsóknin When intervention harms – en niðurstöður hennar voru þær helstar að inngrip gæti skaðað meira en ef barnið var látið óáreitt. Inngripið snéri að innlögn á stofnun. Niðurstöður sýndu að í mörgum tilfellum gekk barni sem hitti sálfræðing 1-2svar í viku betur en því sem lagt var inn á þar tilgerða meðferðarstofnun. Rannsóknir hafa einnig sýnt fram á að börn sem safnað er saman samsama sig oft við þann sem er mest andfélagslegur – þetta getur varla verið hugmyndafræði meðferðarinnar. Með þessu er ég ekki að segja að þær stofnanir sem ég nefndi séu að vinna vont starf – þær gagnast ugglaust mörgum börnum. Við megum hins vegar ekki loka augunum og vona það besta. Fagmennskan er það sem skiptir máli í þessu samhengi og þar má ekki slaka á kröfunum.

Ég skora því að félags- og heilbrigðisyfirvöld að skoða þetta um leið og úttekt er gerð á Breiðavík. Þeir sem gengið hafa í gegnum þessar hörmungar fyrir tilstuðlan opinberra aðila eiga kröfu á því að nútíminn verði líka rannsakaður. Aðeins þannig er réttlætinu fullnægt.

Nagladekk

2007-02-05T11:39:00.000Z

Stundum koma vanhugsuð drög að reglugerðum fram. Drög að reglugerð – eða var það kannski lagabreyting – um tolla á nagladekk leit dagsins ljós í síðustu viku. Svifryksmengun í Reykjavík og á Akureyri hefur aukist gríðarlega síðustu árin og má rekja það til bíla og ekki síst nagladekkja sem spæna upp malbikið. Bílaeign landsmanna hefur aukist gríðarlega síðustu árin. Umhverfisráðuneytið vill því skiljanlega draga úr menguninni og ráðið: tollar á nagladekk. Það gleymdist hins vegar að taka það með í reikninginn að víðast hvar á norðanverðum helmingi landsins – og víðar – eru vegir þannig að fátt kemur til greina annað en að keyra á nöglum. Ég held að þessi svæði þurfi allt annað en frekari álögur af hálfu ríkisins.

Reykjavíkurborg ætti kannski að einbeita sér að skipulagi borgarinnar og almenningssamgögnum - nú eða gjaldtöku á umferð til þess að draga úr svifryksmengun.

Little Miss Sunshine og hjáróma kvak

2007-02-01T11:27:00.001Z

Ég fór í bíó um daginn. Sá myndina Little Miss Sunshine. Fallegasta mynd sem ég hef séð lengi. Þetta er svona mynd sem fær mann til að trúa á lífið. Mæli eindregið með þessari snilld.
Spurning dagsins á BB er hins vegar jafn tilgangslaus og Little Miss Sunhine var tilgangsrík. Spurningin er þessi: Stefnir í hrun á Vestfjörðum í ljósi fólksfækkunar og neikvæðs hagvaxtar? Það er algjör óþarfi að fela staðreyndir eða benda á eitthvað annað – en það er líka óþarfi að hampa hinu neikvæða öllum stundum. Það liggur algjörlega fyrir að við þurfum að hamra á stjórnvöldum vegna ýmissa mála eins og t.d.: Opinberar framkvæmdir settar á fullt á stöðnunartímum, hringtenging rafmagns, öflugri ljósleiðara, fjölgun tekjustofna, bættra samgangna o.s.frv. En hvaða aðferð er best? Við getum talað okkur í hrun – en hverju skilar það?

Hvar liggja kostir Vestfjarða? Þeir liggja m.a. í því að hér má finna stórfenglega náttúru og frið frá skarkala stórborgarlífsins. Borgin hefur sína kosti sem eru ótvíræðir. Við þurfum ekki að keppa við borgina um þá kosti. Gallar borgarlífsins eru hins vegar margir og þar vega kostir okkar á móti. Sigur Rós er t.d. í vandræðum í Mosfellsbæ vegna vegagerðar þar í bæ. Vegagerðin er skiljanleg þar sem byggja þarf nýtt hverfi. En þessi vegagerð gerir starfseminni sem nú er í Kvosinni erfitt fyrir. Ég sendi Sigur Rósar mönnum bréf þar sem ég benti þeim á möguleikana hér fyrir vestan. Ég minntist ekkert á neikvæðan hagvöxt í bréfinu og að enn þyrfti að keyra á einbreiðum vegi í Mjóafirði á leiðinni til Reykjavíkur. Ég benti hins vegar á náttúruna og mannlífið hér – það er einstakt.

Reykjavík er einstök en það eru margir sem eru að leita að öðru. Við höfum upp á þetta annað að bjóða. Við þurfum hins vegar að trúa því til þess að það verði ekki að hjáróma kvaki.

Hrun eða ekki hrun

2007-01-30T14:53:00.000Z

Kristinn H. Gunnarsson er skeleggur þingmaður. Hann hefur oft staðið í lappirnar þegar aðrir gera það ekki. Ég er hins vegar algjörlega ósammála honum og sýn hans á framtíð Vestfjarða. Hann dregur upp þá mynd í grein að hrun blasi við ef ekkert verði að gert. Þetta þykja mér kaldar kveðjur til þeirra sem hér kjósa að búa. Það er auðvitað rétt hjá Kristni að ýmislegt þurfi að gera og mikið af því megi herma upp á ríkisstjórnina. Hins vegar er svæðinu engin greiði gerður með því að leggja það í sjúkrarúm og tala um það eins og um karlægt gamalmenni væri að ræða. Vel má vera að atvinnulíf sé full einhæft og hagstjórn stjórnvalda hvetji ekki menn ekki til dáða – en því má breyta. Þetta snýst um grundvallaratriðin í hagfræðinni: Þegar þennsla er þá dregur hið opinbera úr framkvæmdum - þegar samdráttur er þá eykur hið opinbera framkvæmdir. Við skulum hjálpa stjórnvöldum að gera þetta.

Sjálfsvirðing og metnaður íbúa svæðisins er það sem skiptir máli. Það má vel vera að á Vestfjörðum finnist fólk sem vildi helst geta selt húsin sín og flytjast suður en þorri fólks kýs að vera hérna af fúsum og frjálsum vilja. Það eru ekki frábærar samgöngur eða válynd veður sem hafa haldið fólki hér til þessa dags. Það er hægt að tala allt í gröfina. Það er lögmál að fólk hefur ekki áhuga á því sem fyrirfram er búið að dæma úr leik. Vestfirðir hafa upp á ýmislegt annað að bjóða sem þykir eftirsóknarvert – og það er það sem við eigum að sýna fólki. Fjölskylduvænt umhverfi þar sem öll þjónusta er til staðar er það sem nútímamaðurinn leitar í.

Berklar

2007-01-28T20:55:00.001Z

Heyrði af berklatilfelli um daginn. Viðkomandi var Íslendingur sem smitaðist í Svíþjóð. Heyrði síðan ræðubút frá Guðjóni Arnari þar sem sagðist hræðast útlendinga og smitsjúkdóma – m.a. berkla. Ég held að öruggara væri að banna Íslendingum að ferðast til útlanda en að hefta hingað för íbúa Evrópusambandsins – sé takmarkið að hefta útbreiðslu sjúkdóma. Einnig boðar Guðjón að hagir þeirra sem hingað eru komnir verði kannaðir – það á semsagt að rannsaka fólk ef það er af öðru þjóðerni en íslensku.

Mig langar ekki í svona samfélag. Samfélag þar sem fólk er dregið í dilka eftir þjóðerni. Hvaða útlendingar eiga að falla undir þennan nýja hatt? Eru Bandaríkjamenn, Bretar, Þjóðverjar og Norðurlandabúar undanskildir? Eru sumir hreinni en aðrir? Eru það bara molbúarnir frá Búlgaríu, Póllandi og Rúmeníu sem þurfa að fara í bað?

Annars var líka athyglisvert hvað Margrét Sverrisdóttir sagði um flokkinn sinn: Hann væri holdsveikur þegar kæmi að stjórnarsetu......

Tónlist

2007-01-25T11:13:00.001Z

Staddur í höfuðborginni núna. Reykjavík er falleg borg en mikið er gott að búa fyrir Vestan. Sá á BB í morgun að búið er að staðfesta nokkur atriði á Aldrei fór ég suður um páskana. Ég er auðvitað mjög ánægður að Blonde Redhead mæti vestur enda er ekkert lögmál að tónleikar þurfi alltaf að fara fram í Reykjavík þegar bandið er erlent. Mér segist svo hugur að margir sem ekki þekkja BRH og mæta á hátíðina muni falla fyrir snilldinni. Þau halda reyndar líka tónleika í Reykjavík áður en þau fara vestur og þar mætir einnig Kristin Hersh sem er algjör meistari líka. Það lítur út fyrir að apríl verði góður mánuður í tónlistarlífinu fyrir vestan og sunnan.

Lisa Ekdahl er einnig á leiðinni vestur, suður og norður. Forsala gengur vel og er nær uppselt í Reykjavík og á Akureyri. Vestanmenn eru ekki vanir forsölu á viðburði en samt hefur talsvert selst af miðum. Ég hlakka mikið til að sjá Lisu Ekdahl í Víkurbæ....

Gömul grein

2007-01-19T12:18:00.000Z

Hér eru upplýsingar sem fylgdu greininni. Tölur um pláss eru á mánuði og síðan ári. Á hverjum mánuði geta þannig farið 210 manns í gegnum afeitrun hjá SÁÁ og 60 geta verið í meðferð á mánuði. Miðað við 10 daga meðallengd afeitrunar 30 daga meðallengd meðferðar (eftir afeitrun). Hinar myndirnar lýsa stöðunni í dag (eins og hún var árið 2004 - lítið breytt) og síðan stöðunni eins og ég sá hana með tilkomu greiningarstöðvar.

Fyrir 3 árum birti ég eftirfarandi grein í sunnudagsblaði Morgunblaðsins. Ítarlegri grein eftir mig byggð á sama efni var síðan birt í danska fagtímartinu STOF árið 2005. Mér þótti (og þykir enn) þessar hugmyndir bæði raunhæfar og mikilvægar. Ögmundur Jónasson og Hjálmar Árnason notuðu þær til að vinna þingsályktunartillögur sem komust hvorki lönd né strönd á sínum tíma. Ég held að menn ættu að staldra við núna og velta því fyrir sér hvort hugmyndin sé svo galin. Að halda áfram á sömu braut er hinsvegar að mínu mati algjörlega galið. Byrgið er blóraböggullinn í skipulagsleysinu á meðferðarakrinum. Mál Byrgisins er aðeins birtingarmynd þess sem kerfið okkar býður upp á.

Markvissara skipulag - virkara eftirlit

Kemur til greina að setja á laggirnar greiningar- og ráðgjafarstöð/móttökustöð sem sinnti móttöku og greiningu allra þeirra sem leituðu sér aðstoðar vegna vímuefnavanda á Íslandi?

Á SÍÐUSTU þremur áratugum hefur orðið bylting í vímuefnameðferðarmálum þjóðarinnar. Freeportfarar komu heim og stofnuðu SÁÁ og hófust handa við stofnun afeitrunar- og meðferðarstöðva hér á landi. Fyrir þann tíma var það aðeins Bláa-bandið og deild 10 á Kleppi sem stóð fólki til boða. Það er óhætt að segja að þessi vakning hafi verið lyginni líkust enda hafa u.þ.b. 20 þúsund einstaklingar sótt sér meðferð á þeim tíma sem SÁÁ hafa starfað.

Um 5.770 innlagnir ár hvert

Á markaðnum í dag eru fimm stofnanir og samtök sem sinna meðferð og/eða afeitrun vímuefnasjúklinga á Íslandi. Auk þeirra sem hér eru taldar upp eru heimili barnaverndarstofu en eitt þeirra, Árvellir, hefur boðið upp á meðferð fyrir eldri en 18 ára en ekki er ljóst hversu mörg pláss að jafnaði eru í boði.

Það skal tekið fram að gert er ráð fyrir að meðaltals afeitrun sé um 10 daga á hvern einstakling. Meðal dvalartími í framhaldsmeðferð eftir afeitrun er 28 dagar - í reynd er tíminn oft lengri eða skemmri en gengið er útfrá meðaltalstölum hér. Í Krýsuvík og í Byrginu dvelur fólk jafnan lengur en mánuð í senn. Úrræði Landspítalans í Arnarholti rúmar 10 fyrrverandi vistmenn úr Gunnarsholti. Á þessari stundu eru örlög Arnarholts ekki ráðin en uppi eru hugmyndir um að loka þessu úrræði.

Lítið eða ekkert eftirlit
Aðgangur að vímuefnameðferð á Íslandi verður að teljast mjög góður, hvort sem tekið er mið af samanburðarlöndum eða biðlistum í heilbrigðiskerfinu almennt. Lítið eða ekkert eftirlit er með því hvert einstaklingar fara í meðferð, hversu oft þeir fara og hversu stutt líður á milli meðferða. Þannig getur einstaklingur farið á Vog í meðferð á morgun, dvalið þar í 10 daga og lokið 28 daga meðferð á Staðarfelli í framhaldi af því. Viku eftir þá meðferð getur sami einstaklingur leitað sér meðferðar í Byrginu, Krýsuvík eða Hlaðgerðarkot. Það er ekki óalgengt að hitta fyrir einstaklinga í meðferðarkerfinu sem eiga yfir 10 innlagnir að baki.

Hörð samkeppni, óvægin gagnrýni
Vandi vímuefnameðferðar á Íslandi felst fyrst og fremst í því að margir ólíkir aðilar - sjálfseignastofnanir, einkahlutafélög og opinberar stofnanir - bjóða upp á meðferð. Vegna þessa fara tvö ráðuneyti með málefni vímuefnameðferðar á Íslandi og jafnvel þrjú eins og kom í ljós þegar utanríkisráðuneytið kom að málefnum Byrgisins. Dómsmálaráðuneytið kemur einnig við sögu í málefnum fanga og menntamálaráðuneytið í málefnum barna á skólaskyldualdri. Rekstrarlegar forsendur byggjast jafnt á frjálsum framlögnum, kostnaðarþátttöku notenda meðferðar og beinum styrkjum frá ríki og sveitarfélögum. Samkeppnin er því oft hörð og gagnrýnin óvægin á milli mismunandi sjónarmiða. Oftar en ekki eru birtar fréttatilkynningar frá þessum aðilum þar sem ástandinu er lýst og er það yfirleitt slæmt og biðlistar langir. Í skýrslu sem unnin var fyrir Heilbrigðisráðuneytið árið 1997 er þessi þáttur nefndur. Þar kemur m.a. fram að SÁÁ stundi fremur markaðsrannsóknir en vísindalegar rannsóknir enda byggir afkoma þeirra á að hvert pláss sé skipað. (Shaffer, J. Howard. Mat á áfengis- og vímuefnameðferð)

Stjórnlaust aðgengi án yfirsýnar
Leiðirnar eru margar og mismunandi. Trúfélög bjóða meðferð sem byggð eru á trúarbrögðum; aðrir bjóða upp á hugræna atferlismeðferð, aðrir á Minnesotameðferð og enn aðrir blöndu af þessu öllu. Inn í þetta fléttast síðan aðstoð félagsþjónustu sveitarfélaga og ýmis áfangaheimili líknarfélaga. Eins og meðfylgjandi teikning gefur til kynna að þá eru hindranir í kerfinu raunverulegar. Aðilar tala ekki saman og samstarf t.d. félagsþjónustu sveitarfélaga og meðferðaraðila er takmarkað. Yfirsýn skortir tilfinnanlega og aðgengi að meðferðarúrræðum er nær stjórnlaust. Afleiðingar þessa eru verri meðferð, verri árangur og sóun fjármuna.
Forgangsröðunin er nokkuð brengluð ef litið er á þann fjölda sem leggst í meðferð á ári hverju. Þegar skorið er niður í meðferðarkerfinu virðist vera byrjað á öfugum enda. Á Vogi, sem er líklega besta afeitrunarúrræðið á Norðurlöndum, liggja oftar en ekki einstaklingar sem undirritaður fullyrðir að ekki þurfi allir á afeitrun að halda. Þar starfa læknar, hjúkrunarfólk, meðferðarfulltrúar og annað starfsfólk og kostar sólarhringurinn talsvert. Hinir sem veikari eru fá afeitrun í Byrginu, á Hlaðgerðarkoti eða á deild 33-A. Á þeim stöðum eru faglegar kröfur og aðbúnaður allt annar og verri en það sem þekkist á Vogi. Hér ber að árétta að í huga undirritaðs er ekkert samasemmerki á milli Vogs og betri árangurs - samanborið við aðra aðila. Hins vegar er óumdeilanlegt að Vogur er besta sjúkrahúsið fyrir vímuefnasjúklinga sem þurfa á afeitrun að halda.

Hvað er til ráða?
Erfitt er að gera sér grein fyrir árangri af vímuefnameðferð á Íslandi. Árangurstölur koma jafnan frá meðferðaraðilunum sjálfum. Þær fáu rannsóknir sem óháðir aðilar hafa gert gefa tilefni til að ætla að árangur sé í kringum 10% - 15% (t.d. rannsókn Kristins Tómassonar árið 1995 og 1996). Göngudeildarmeðferð er tiltölulega lítið notuð hér á landi þó að vissulega hafi úrræðum eitthvað fjölgað á sl. árum en samkvæmt rannsókn Kristins er árangurinn ekkert lakari af slíkri meðferð en að þegar um innlögn er að ræða. Undirritaður telur að í stað þess að reka þrjár til fjórar afeitrunarstöðvar í landinu væri nægjanlegt að reka eina. Þangað myndu þeir sjúklingar sem væru hvað veikastir leita eftir afeitrun. Aðrir gætu fengið aðstoð á göngudeildum. Meðfylgjandi teikning gefur hugmynd hvað hægt væri að gera. Hér er ekki tekin afstaða til þess hvaða stofnunum eða samtökum er ofaukið en undirritaður dregur stórlega í efa að 5500 innlagnir ár hvert sé í samræmi við þörfina.

Markvissara skipulag og virkara eftirlit
Í tillögu Vinstrihreyfingarinnar græns framboðs sem liggur fyrir alþingi, og er í samhljómi við tillögur Samfylkingar og Framsóknarflokks eru eftirfarandi atriði reifuð: "Atriði sem eðlilegt væri að tekin yrðu til gagngerrar skoðunar væru eftirfarandi:

a. Er hægt að koma á markvissara eftirliti með meðferðarúrræðum vímuefnaneytenda á Íslandi?

b. Væri til bóta að gera kröfu um árangurstölur frá þeim aðilum sem sinna meðferð vímu efnaneytenda á Íslandi og þær þá teknar saman af hlutlausum aðilum, sbr. rannsóknir Kristins Tómassonar árið 1995 og 1996?

c. Kemur til greina að setja á laggirnar greiningar- og ráðgjafarstöð/móttökustöð sem sinnti móttöku og greiningu allra þeirra sem leituðu sér aðstoðar vegna vímuefnavanda á Íslandi?

Mikið starf hefur verið unnið á þessu sviði heilbrigðisþjónustu síðustu áratugina og margt gott af því leitt. Á því er ekki nokkur vafi. Margt bendir þó til að hægt væri að ná enn betri árangri með markvissara skipulagi og virkara eftirliti. Undirritaður tekur heilshugar undir það og vonar að sverðin verði slíðruð og málefnaleg og efnisleg umræða taki yfir á kostnað tilfinningaraka og sleggjudóma.

Hagvöxtur

2007-01-18T09:12:00.000Z

Hagvöxtur á Vestfjörðum var neikvæður um 6% þegar tekin eru saman árin 1998 til 2004. BB spurði mig út í þetta og ég svaraði:

Þetta kemur mér ekki á óvart. Vestfirðir hafa um langt árabil verið í svelti þegar kemur að opinberum framkvæmdum. Ríkið hefur ítrekað haldið að sér höndum. Þetta sést m.a. þegar horft er til samgöngumála. Við búum enn við það ástand að þjóðvegurinn til Reykjavíkur er á kafla einbreiður malarvegur. Við búum einnig við lakari þjónustu þegar kemur að fjarskiptum og rafmagni. Stjórnvöld og sveitarstjórnir ganga ekki í takt. Sveitarfélögin hér á svæðinu gera sér flest grein fyrir því lykillögmáli í hagfræðinni að á samdráttartímum þurfi opinberir aðilar að draga vagninn og framkvæma. Þetta hafa sveitarfélögin reynt að gera en það dugar ekki til á meðan ríkisvaldið heldur að sér höndum. Það er sorglegt þegar dregið er úr framkvæmdum hins opinbera á Vestfjörðum til þess að slá á þenslu á öðrum svæðum.

Krafturinn í fólkinu sem býr á svæðinu er mikill og það er beinlínis ósanngjarnt hvernig stjórnvöld hafa komið fram við þetta fólk. Jarðvegurinn er mjög góður hér fyrir vestan en til þess að grasið taki að spretta þarf áburð og þetta verða stjórnvöld að viðurkenna og axla sína ábyrgð. Á kosningavetri er vert að spyrja alla frambjóðendur kjördæmisins og reyndar landsins alls: Ertu til í að ganga í takt með okkur? Við eigum að krefjast þess að menn geri grein fyrir hugmyndum sínum um svæðið. Ef menn axla þessa ábyrgð og sýna lit – er ég fullviss að hagvöxtur á svæðinu verði nær 2 stafa tölu áður en langt um líður.

Greiningarstöð

2007-01-15T18:16:00.000Z

Samhjálp er gott líknarfélag. Þar er unnið ágætt starf sem viðurkennt hefur verið undanfarin ár. Ég geri hins vegar athugasemd við það að obbi þess starfs sem snýr að langt leiddum alkóhólistum á Íslandi skuli vera á höndum Samhjálpar. Reykjavíkurborg hefur falið Samhjálp að sinna Gistiskýlinu, sambýlum á Miklubraut og súpueldhúsi. Auk þess rekur Samhjálp Hlaðgerðarkot og Stoðbýli við Hverfisgötu. Núna hefur Félagsmálaráðuneytið falið Samhjálp að reka Byrgið að Efri Brú. Það má því segja að ef þú ert staddur á götunni og ert fárveikur alkóhólisti er nær eingöngu um Samhjálp að ræða þurfir þú aðstoð.

Hvers vegna dregur úr fagmennsku þegar veikari einstaklingar eiga í hlut? Myndum við sætta okkur við að leita lækninga hjá líknarfélagi þar sem leikmenn bæru hitann og þungann af rekstrinum? Ég ítreka að hjá Samhjálp er margt frábærlega hæft fólk við störf. Kannski mætti leysa þetta með því að ráða fleiri lækna, félagsráðgjafa, sálfræðinga sem myndu styrkja starfið hjá Samhjálp þar sem fyrir eru margir vímuefnaráðgjafar. Tengingin á milli trúarinnar og meðferðarstarfsins getur einnig verið þröskuldur ef aðeins er um einn valkost að ræða.

Ég velti því fyrir mér hvort hugmyndin um greiningar- og ráðgjafarstöð sé svona afleit - þegar staða mála er skoðuð í dag.......

Pétur og Reykjavík!

2007-01-13T01:15:00.000Z

Margt var skoðað í kvöld. Bönd sem fólk stóð í röðum til að sjá og heyra í. Flest voru hvorki fugl né fiskur - þó var ein og ein perla. Pétur Ben fór á svið kl. 20 í kvöld og var algjörlega frábær. Ég hef aldrei séð Pétur spila áður nema sem undirleikari Mugison. Hann átti salinn frá fyrstu mínútu og gæðalega var hann nokkrum mílum frá því sem boðið var upp á víðsvegar um Groningen í kvöld. Pétur Ben er góður tónlistarmaður með sérstöðu - það er ansi gott nesti.

Reykjavík! stigu á stokk kl. 24.15 og vá! Gummi og Kristján eru auðvitað bara þarna á meðan aðalbandið Dr. Gunni er í pásu..En drengirnir fóru á kostum. Þeirra langbesta gigg - mikill sviti og hiti og rokk. Fóru hamförum og höfðu eins og Pétur Ben alla á sínu bandi - og það er ekki létt í borg þar sem 180 tónleikar eru haldnir á 3 dögum og þar að auki er Reykjavík! hljómsveit sem enginn hefur heyrt í áður. Þetta var og er til fyrirmyndar.

Peter, Björn og Mary - ég meina John

2007-01-11T23:19:00.000Z

Merkilegt. Sit hér á hóteli í Zuidlaren í Hollandi eftir ágætt kvöld í Groningen og bloggerinn er á þýsku. Þessar IP-tölur eru greinilega að gera það gott.

Hitti marga ágæta menn í kvöld og sá aðeins af böndum. Ævintýraleg innkoma okkar á tónleika Peter, Björn og John stendur upp úr. Það var troðið á staðnum þegar við mættum á þá ágætu tónleika og 300 manns í röð fyrir utan. Ónefndur meistari úr Hlíðunum fór með okkur hringinn í kringum húsið og barði upp á að aftan. Þar beitti hann miklum persónutöfrum og talaði 5 manns inn. Þess ber að geta að hann hefur aldrei komið til Groningen áður. Bandið var ágætt og mæli ég eindregið með því. Þið sem ekki eruð búin að tryggja ykkur miða á Nasa ættuð að gera það hið fyrsta.

Og aftur Lisa

2007-01-09T22:40:00.002Z

Þetta þykir mér besta áfram stelpur lag allra tíma:

Hon förtjänar hela himlen

Hon är inte nåt man får,
hon är nån man ska förtjäna
Du höll henne aldrig högt,
du låg aldrig nere på knäna
Hon är inte nåt man har,
inget att förfoga över
Du sa att hon var så svår,
men klagar för att det är över

Löftet hon gav var aldrig att vara i ditt våld, att stå
under din kontroll
Löftet hon gav rörde något annat,
men jag antar att det inte längrespelar någon roll
För hon kommer aldrig mera hit
Jag ska försvara henne om jag kan
För hon förtjänar hela himmelen
Och en mycket bättre man

Du sa att du är beredd,att va storsint, att förlåta
Vad svarar man på sånt,
ska man skratta, ska man gråta
Du som gjort henne så illa,
ska du kalla henne brottslig nu?
Om hon någonsin ska förlåta,
är det hon, inte du

Löftet hon gav, var aldrig att följa dina nycker
Att ingå i ditt spel
Löftet hon gav rörde något annat,
så nu kan hon inte klandrasså nu kan hon inte klandras
Hon gör inte något fel
För hon kommer aldrig mera hit
Jag ska försvara henne om jag kan
För hon förtjänar hela himmelenOch en mycket bättre man

Du sa att hon var så svår,rent omöjlig att förstå
Det kan nog tänkas du har rätt,
mellan er två var det så
Men nu vill du åberopa brott
Och nu säjer du i raseri,att den förräderskan har gått
Jag säjer hon har gjort sig fri
Hon har gjort sig fri

Firringin

2007-01-08T01:57:00.000Z

John Cleese er fyndinn í Kaupþingsauglýsingunni - það verður ekki af honum tekið. Las síðan á einhverri bloggsíðunni að þeir hefðu haldið árlegt áramótapartý sitt í London um helgina. Duran Duran mættu og tóku lagið. Í Rússlandi héldu olíubarónar sitt partý og fengu George Michael til að taka nokkur lög fyrir rúmar 200 milljónir kr. Ekki veit ég hvað Duran Duran kostaði fyrir þessa velvöldu vini Kaupþings en þetta er eitthvað svona pínulítið firrt verð ég að segja.

Lisa

2007-01-05T23:34:00.001Z

Ég verð auðvitað að auglýsa Lisu Ekdahl - annað væri firra. Ég hugsa að þetta verði gott geim. Kæmi mér ekki á óvart ef Bolungarvík verður eftirminnileg.

Lisa Ekdahl á ferð um landið
Lisa Ekdahl heldur tónleika á Nasa fimmtudaginn 1. mars, föstudaginn 2. mars á Græna Hattinum Akureyri og laugardaginn 3. mars í Víkurbæ í Bolungarvík. Miðasala hefst þriðjudaginn 9. janúar kl. 10 á midi.is og í verslunum Skífunnar og velvöldum BT verslunum. Miðaverð aðeins 2900 kr.

Lisa Ekdahl er mörgum kunn á Íslandi enda er hún sannkallaður Íslandsvinur. Hefur spilað ásamt hljómsveit í Austurbæjarbíói og Háksólabíói fyrir troðfullu húsi. Að þessu sinni er Lisa á ferð með kassagítar og undirleikaranum Mattias Blomdahl sem spilar á gítar, hljómborð og önnur hljóðfæri. Draumur hennar var að spila úti á landi á Íslandi og þann draum lætur hún rætast nú. Lisa Ekdahl á tryggan hóp aðdáenda hér á landi og má með sanni segja að sú aðdáun sé gagnkvæm þegar kemur að landi og þjóð.

Lisa Ekdahl sló í gegn með hljómplötunni Vem vet árið 1994 en það var hennar fyrsta plata. Sú plata er ein sú söluhæsta á Norðurlöndunum til þessa dags. Lisa Ekdhal hefur síðan farið ýmsar leiðir í tónlistarsköpun sinni – allt frá djassi og bossanova yfir í popp. Hún á miklum vinsældum að fagna í Danmörku sem er óvenjulegt þar sem sænskir tónlistarmenn hafa átt á brattan að sækja í Danaveldi. Hún er þekkt út um alla Evrópu og hafa plötur hennar selst gríðarlega vel í Frakklandi.

Breyskur maður

2007-01-03T23:28:00.000Z

Ég er breyskur. Það verð ég víst að viðurkenna. Fór í fótbolta inn á Ísafjörð eins og svo oft áður á miðvikudögum. Eftir 47 mínútna leik gekk minn maður af velli hundfúll og leiðinlegur. Uss, Grímur með gleraugun og gráa hárið lét fótboltaleikinn fara svo í taugarnar á sér að hann náði ekki að klára tímann. Hneisa og ég skulda strákunum í það minnsta 50 armbeygjur með einari til að sýna fram á sanna iðrun. Helvítið hann Lýður mun nudda mér upp úr þessu fram að næstu jólum – ef hann þá nokkurn tímann hættir að minnast á þetta.

Ég baðst þó afsökunar í sturtuklefanum – en það er ágætt á gamlan hund að fá á baukinn.....

Skulda milljón í banka og ég bý inn í Vogum...

2007-01-02T19:40:00.000Z

...Með barþjóni að færir mér súrmeti í trogum.

Það 2. janúar og meistari Einar Jónsson á afmæli í dag. Hann lengi lifi og vonandi kemur hann einhvern tímann aftur heim frá Noregi. Áramótin í Víkinni róleg en notaleg. Brenna og flugeldar og óteljandi konfektmolar og lambakjöt. Nýtt líf númer 107 byrjaði síðan í dag – eins og lög gera ráð fyrir. Ég ætla að hætta að fitna á morgun.....

Áramótaskaupið var frábært. Loksins endurnýjun og frumleiki. Ég og Helga Vala hlógum eins og vitlaus værum – þá hlýtur þetta hafa verið gott. En eins og alltaf eru 300.000 skoðanir á húmornum, þannig á það líka að vera.

Get ekki betur séð en helsta áhugamál Helgu Völu í pólitíkinni sé á dagskránni núna um áramótin. Vinnutími Íslendinga og samvera með fjölskyldunni. Kemst iðulega á dagskrá í kringum ræðu biskupsins og forsetans. Forsætisráðherrar tala yfirleitt ekki um þetta mál – þeir einbeita sér frekar að stuðinu í kringum bankana og verðbréfasirkusinn. Þetta er auðvitað út í hött. Hvað skiptir máli þegar á hólminn er komið? 1 milljarður á bankabókinni eða heilsteyptur einstaklingur sem maður tók þátt í að móta með því að vera til staðar? Við þurfum að skipta um gír og snúa við blaðinu. Vonandi verður næsta áramótaræða forsætisráðherra meira tengd þessum gildum.

Kosningamál í vor...ætli það.....

Áramót

2006-12-31T12:59:00.000Z

Var að lesa Össur rétt í þessu. Hann veltir fyrir sér hinu og þessu stjórnarmynstrinu í vor. Þetta eru skemmtilegir tímar fyrir þá sem gaman hafa af stjórnmálum. Verður það Sjálfstæðisflokkurinn ásamt VG - nú eða Samfylkingu sem stjórna skútunni eða verður það stjórn VG, Samfylkingar og Frjálslyndra? Getur verið að Framsóknarflokkurinn rísi enn á ný og komi á óvart? Völvurnar minnast ekki á það - utan Dr. Gunna sem spáir því að Framsóknarflokkurinn stjórni eftir kosningar og að Paris Hilton sjáist brókarlaus í hverjum mánuði.

Annars finnst mér fróðlegt að meta hverjir eru menn hverra innan stórnmálanna. Össur er með lista sem heitir Mínir menn þar sem samflokksfélagar í bloggheimum eru taldir upp. Merkilegur listi og gefur ákveðnar vísbendingar hvar hjartað slær. Það er sunnansláttur með ákveðnum áherslum. Ég held að ég leggist í rannsóknir (fyrir sjálfan mig) og hanni samsæriskenningu (bara fyrir mig) og kanni síðan sannleiksgildi hennar eins og færi gefst.

Svartur dagur

2006-12-30T10:35:00.000Z

Árið 1988 sá ég myndir frá Kúrdaþorpi þar sem sjá mátti börn og konur liggja í valnum fyrir Saddam og hans geðsýki. Vesturveldin seldu honum vopnin og voru enn vinir hans á þessum tíma. Það var reyndar ekki fyrr en löngu eftir fyrra Persaflóastríð sem frændur okkar Svíar hættu að selja Saddam vopn.

Í nótt var Saddam hengdur fyrir glæpi sína. Mikið held ég að margir þeir sem eiga um sárt að binda vegna stjórnar Saddam og þeir sem eru í sárum vegna innrásar Bandaríkjamanna í Írak séu vonsviknir í dag. Dauðarefsing og allt sem kemur að henni er að mínu mati aldrei réttlætanleg – hver sem á í hlut. Árásina á Írak var heldur ekki hægt að réttlæta. Hræsnin í kringum stríðið var slík að maður skammast sín á stundum fyrir hinn vestræna uppruna sinn. Af hverju ætli menn hafi ekki hreinsað heiminn af Saddam þegar hann drap konur og börn árið 1988? Nú fyrst það tækifæri rann mönnum úr greipum hvers vegna bjargaði Sámur frændi Írökum ekki 1991? Í kjölfarið refsaði Saddam þjóð sinni grimmilega og tók þúsundir af lífi í suður Írak. Nei, það var ekki þörf á þessari úthreinsun fyrr en árið 2003 þegar nákvæmlega ekkert réttlætti aðgerðina. Þá höfðu refsiaðgerðir Sameinuþjóðanna dregið allan kraft úr þjóðinni og lagt hluta hennar í gröfina. Þvílík ömurð og allsherjar tilgangsleysi.

Viðskiptafræði

2006-12-29T09:41:00.000Z

Í gær bárust fréttir af því að 365 miðlar hafi selt DV og tímaritin sín tveimur félögum. Annað félagið er í eigu 365 miðla og einhverra annarra sem eiga örugglega í 365 miðlum líka. Í fyrradag seldi FL group Sterling flugfélagið og voru kaupendurnir Fons og FL goup. Allt eru þetta sömu aðilarnir að selja sjálfum sér eigin félög. Ég gleymdi greinilega að taka viðskiptafærði 103.

Síðan verð ég að játa að mér þykja fjölmiðlar ótrúlega áhugasamir að segja fréttir af sápuóperunni innan eigin raða. Í 300.000 manna þjóðfélagi eru ritstjórar allt í einu orðnir gríðarlega merkilegt fyrirbæri. Það renna í gegnum fjölmiðla milljónir og milljónir ofan og fæstir þeirra skila krónu til eigenda sinna. Af hverju ætli það sé svona eftirsóknarvert að eiga fjölmiðil?

Gleraugu

2006-12-28T12:44:00.000Z

Jæja, ég er ekki aðeins farinn að grána og orðinn gott efni í velmegunarístril – ég er líka kominn með gleraugu. Þetta eru auðvitað grafalvarleg tíðindi og minna mig á að líklega er ég ekki eilífur eins og ég hef haldið sl. 36 ár. Það minnir mig líka á að ég er 36 ára en ekki 18 ára eins og mér hefur fundist frá því að ég og Rúnar Gestsson héldum ógleymanlega afmælisveislu mína árið sem ég varð 17 ára. Sú veisla er ritskoðuð og verður ekki aflétt leynd fyrr en eftir 50 ár. Fannst ég verða 18 þegar ég varð 17 – og þannig hefur þetta verið síðan.

Fall jólanna

2006-12-27T16:50:00.000Z

Jóladagur var athyglisverður í lífi mínu. Fyrir utan að hafa bætt hressilega utan á mig með stjórnlausu áti á Þorláksmessu, aðfangadag og jóladag (hélt áfram á 2. í jólum) - lenti ég í miklu ævintýri. Við læstum okkur úti þegar við gengum út á leiðinni í jóladagsmessu. Þegar heim var komið ákvað húsbóndinn að hífa sig upp á skyggnið fyrir ofan innganginn og reyna að losa glugga. Það vildi ekki betur til en svo að ég hrapaði aftur fyrir mig og lenti í miðjum garðinum. Þar sem ég var að falla sá ég líf mitt renna hægt fyrir augunum á mér og var ég viss um að mínir dagar væru senn taldir. Ég lenti með miklu brambolti á handriði og þaðan út í garð. Handriðið breyttist í duft en einhverra hluta vegna stóð ég upp eftir byltuna alveg óskaddaður. Ég lifi!

Ég hugsa nú að nágrannar mínir sem dvelja og vinna í Skýlinu hafi frá ýmsu að segja eftir að hafa haft Grím Atlason og fjölskyldu fyrir augunum í nokkra mánuði. Það er t.d. alveg ósögð sagan af því þegar frú Grímur fór til N.Y. og önnur kona fór í bað á Vitastíg 8.......

Fjarri 101

2006-12-24T11:08:00.000Z

Frúin á númer 12 klikkaði ekki þegar kom að skötunni frekar en á felmtri og öðrum Aðalsteinskum málvillutendensum hér á númer 8. Fyllingar losnuðu og það flagnaði vel í efri gómi. Fyrsta Þorláksmessa lífsins sem ekki var eytt í 101 - og viti menn það var bara hið besta mál. Gott fólk bauð í hlaðborð þar sem kræsingarnar flóðu um allt og horft á mynd bolvísku fjöllistamannanna Lýðs og Írisar. Þetta var fullkomin Þorláksmessa sem endaði á Superman Returns. Lex Luther var flottur í meðförum K.S.

Núna er aðfangadagur og einnig sá fyrsti fjarri 101 og hann leggst vel í alla á heimilinu. Ég er hins vegar haldinn einhverri hundaþráhyggju sem ég er ekki viss um að sé svo skynsamleg. Frúnni á númer 8 stekkur ekki bros þegar snati er nefndur. Litlir hvolpar fá hana ekki einu sinni til að brosa - enda veit hún sem er að öll slík svipbrigði gætu verið túlkuð málstað mínum í vil.

En ætli sé ekki best að fá úr þessu skorið með kommentum. Ef 3 svara og tveir segja snati liggur málið ljóst fyrir. En falli atkvæðin málstað kaldlyndra pragmatíkera í vil verður bara kosið aftur og aftur þangað til ásættanlega niðurstaða fæst - rétt eins og gert er í Evrópukosningum.

Nú reynir á

2006-12-22T14:39:00.000Z

Nú reynir fyrst á Vestfirði. Á morgun er Þorláksmessa og þá verður ekki gefið neitt eftir. Skötuhlaðborð á Gaflinum bjóða upp á mildar og extra útgáfur af þessum kræsingum en það er auðvitað bara plat sem þekkist væntanlega ekki hér. Forgjöf verður ekki liðin - skatan verður að standast bestu skötu sem Bjarni og Rín hafa boðið mér sl. 13 ár. Ég sætti mig ekki við neitt minna. Ég geri ekki ráð fyrir að geta halað niður bíómyndum frá Símanum eins og sunnlendingar en ég geri ráð fyrir að skatan sé umtalsvert kæstari og öflugri hér í Mekka kæstra afurða í heiminum.

Ég mun ekki líða neinar málamiðlanir eða meðalmennsku.

Vegagerðin og andi jólanna

2006-12-19T22:32:00.000Z

Vegagerðin bjargaði mér 2svar í gær. Fauk útaf í hálku rétt við Hólmavík og síðan á miðri Steingrímsfjarðarheiði. Ég var svo heppinn að vegagerðin sá aumur á mér og dró mig upp úr sköflunum í bæði skiptin. Fyrri byltan var vegna vitleysisgangs í mér. Þar ætlaði ég að taka fram úr vegagerðarbíl á gleri – svoleiðis gerir maður ekki. Hins vegar fauk ég bara útaf á Heiðinni án þess að ráða neitt við neitt. Ég sendi þeim konfekt í hádeginu – enda sómamenn að redda vitleysingnum sem óð á fjöll í brjáluðu veðri.

Reyndar var ég hálf sjokkeraður út af öðru í gær. Fór og keypti hamborgara í Nesti á leiðinni úr borginni. Var lengi að komast í Nesti þar sem umferðin var þung þrátt fyrir að það væri mánudagur og klukkan bara 14.30. Pantaði mér borgara og fann mér borð. Náði mér í mogga til að lesa með brauðinu og lagði á borðið. Síðan var borgarinn sóttur en þegar ég kom aftur að borðinu var kona að taka blaðið. Ég sagði henni: Fyrirgefðu en ég ætlaði að lesa blaðið og lagði það á borðið meðan ég náði í matinn minn. Hún svaraði með þjósti: Hvernig átti ég að vita það? og settist niður með blaðið og horfði á mig með grimmum augum. Ég óskaði henni alls hins besta og náði mér í annað blað og las. Er tillitssemi ekki lengur dyggð? Ég er mjög feginn að vegagerðin var ekki í þessu skapi.

Skakkamanage

2006-12-16T02:54:00.000Z

Bara svona fyrir þá sem kannski eru ekki búin að hlusta. Ég mæli algjörlega með Svavari og frú - minna mig á Arrested Development og Belle and Sebastian og þau sjálf....

Costa del Jol

None Smoker

Líf utan höfuðborgarsvæðisins

2006-12-15T16:31:00.000Z

Fyrir stuttu bárust fréttir af aukinni unglingadrykkju í Reykjavík. Leitt var líkum að því að tenging væri á milli samverustunda barna og foreldra og drykkju unglinga. Síðustu árin hefur samverustundum foreldra og barna fækkað. Á sama tíma hafa drykkja og reykingar barna á höfuðborgarsvæðinu aukist. Þetta er merkilegt í ljósi þess að upplýsingar um skaðsemi drykkju og reykinga hafa aldrei verið aðgengilegri. Við höfum aldrei varið jafn miklu og einmitt núna í fræðslu og forvarnir. Meðferðarúrræði eru fjölmörg og félagsþjónusta á höfuðborgarsvæðinu hefur bólgnað út. Grunnskólinn er einsetinn og biðlistar eftir leikskólaplássi eru hverfandi í dag miðað við það sem áður var.

Þenslan tærir
Viðvarandi þensluástand hefur haft umtalsverð áhrif á lífshætti þorra Íslendinga. Aðgangur að lánsfé gerir það að verkum að meðalfjölskyldan er skuldsettari en áður. Eignirnar aukast en greiðslubyrði eykst jafnt og þétt. Íslendingar þurfa því að vinna meira ætli þeir sér að ná að greiða fyrir rándýrt húsnæði á þenslusvæðum og taka þátt í kapphlaupinu. Samvistir barna og foreldra, maka og stórfjölskyldu eru með allt öðrum hætti í dag en þekktist fyrir áratug eða svo.

Fólk hefur reynt að mæta hækkun á húsnæðismarkaði og hraða höfuðborgarinnar með því að flytjast á jaðarsvæði höfuðborgarinnar. Þannig ferðast mörg þúsund manns á milli þéttbýliskjarna í kringum höfuðborgina á leið sinni til og frá vinnu hvern dag. Eins og umferðarþróun hefur verið síðustu árin má ætla að fjöldi manna eyði hátt í tveimur klst. í ferðalög vegna vinnu á dag. Íslendingar vinna að meðaltali meira en aðrar þjóðir veraldar. Þegar heim er komið bíður fólks smátúrar í Bónus, með börnin í tómstundastarf og matseld í anda Jóa Fel. Það er því ekki að furða þó samverustundum foreldra og barna fari fækkandi í slíku umhverfi.

Tækifærin á landsbyggðinni
Það felast ótal tækifæri á landsbyggðinni. Margir sjá aðeins tækifæri í virkjunum og ferðamennsku en þá er helsti auðurinn eftir – samfélögin sem finnast út um allt land. Með stórkostlegum framförum á sviði fjarskipta og samgangna eru landfræðilegar hindranir á undanhaldi. Störf eru ekki lengur bundin við eina starfsstöð – óstaðbundin störf eru raunverulegur kostur í dag sem fleiri og fleiri fyrirtæki nýta sér. Húsnæðisverð er allt annað og nær raunverulegri kaupgetu fólks en á þenslusvæðunum. Þrýstingur auglýsingasamfélagsins er ekki jafn grímulaus og pressan þar af leiðandi minni.

Í Bolungarvík er samfélag sem byggir á þeirri grunnhugmynd að þjónusta og atvinnulíf sé innan seilingar við heimilið. Tækifæri þeirra fjölskyldna sem eiga þess kost að losna við klafa efnishyggjunnar eru mörg í Víkinni. Öll grunnþjónusta er í 5 mínútna göngufæri fyrir þorra íbúa sveitarfélagsins. Sundlaug, heilsugæsla, íþróttahús, grunnskóli, leikskóli, félagsheimili, kaffihús, bókasafn, sýslumaður, verslun, bensínstöð og bankaútibú – allt í 5 mínútna göngufæri. Sveitarfélagið greiðir götu fyrirtækja sem vilja sækja til bæjarins. Góð aðstaða er til staðar fyrir þau fyrirtæki sem hug hafa á að reka einmenningsstarfsstöðvar. Með þessu geta ólík fyrirtæki nýtt sama ritara og skrifstofubúnað. Þau fyrirtæki sem geta nýtt sér óstaðbundin störf eiga fjölmörg sóknarfæri. Hagræðingin sem skapast við það að losa dýrt húsnæði í höfuðborginni og eignast ánægðan og öflugri starfsmann er augljós.

Framtíðin er fyrir vestan
Ég skora á fólk sem situr heima og hefur áhyggjur af reikningabunkum og tímaleysi að skoða kostina við einfaldara líf fjarri skarkala höfuðborgarinnar. Streð á þeim tíma sem börnin eru að vaxa úr grasi er ekkert lögmál. Það þarf enginn að vinna 12 tíma á dag til þess eins að keyra um á Landcruser og borga af íbúðinni í Vesturbænum. Kíkið vestur á firði – það er miklu innihaldsríkara og skemmtilegra.

Hagræðing

2006-12-13T12:09:00.000Z

Íslandspóstur er fyrirtæki í samkeppnisrekstri og fyrirtæki sem skilar betri peningalegri afkomu í ár en síðustu ár. Reksturinn ku fara batnandi. Svona horfir dæmið við hinum hefðbundna endurskoðanda sem lítur málið úfrá beinhörðum krónutölum. Notendur þjónustu Íslandspósts eru kannski ekki alveg sammála þessu – sér í lagi þeir sem búa á landsbyggðinni.

Nú stendur til að loka póstafgreiðslu á Stað í Hrútafirði. Frá því að Íslandspóstur skipti yfir í markaðshaminn hefur afgreiðslustöðum fækkað verulega og öll umgjörð starfseminnar breyst. Þjónusta hefur verið skorin niður í réttu hlutfalli við markaðsstöðu svæða. Hagræðingin hefur tröllriðið öllu og eftir standa tóm pósthús. Ég leyfi mér að fullyrða að þetta sé óskynsamleg þróun.

Hvað er grunnþjónusta og hvað er munaður? Póstþjónusta er grunnþjónusta og ein af forsendum byggðar í þessu landi. Með því að hlutafélagavæða póstþjónustuna á Íslandi, og gera það með jafn takmörkuðum kvöðum og raun ber vitni, er verið að rýra lífsgæði Íslendinga. Þetta er óheillaþróun sem byggir á ákvörðunum púrítanískra frjálshyggjumanna, sem tóku ekki með í reikninginn breytur, eins og búsetu í landinu, þar sem þeir sátu við teikniborðið og hönnuðu framtíðina.

Er hagræðing í því að fólk flykkist í hlíðar Úlfarsfells og eftir standi tóm hús utan höfuðborgarsvæðisins? Sumir halda því reyndar fram - en sé horft til framtíðar er alveg ljóst að blómlegir og öflugir byggðakjarnar út um allt land er forsenda vaxtar. Öflug landsbyggð og öflug höfuðborg er töfraformúlan. Þessari breytu þurfa hagspekúlantar að kynnast áður en hagræðingarplanið er hannað.

Grjóthrunið

2006-12-11T22:22:00.001Z

Hérna má sjá Lýð og allan þáttinn um læknana hjá Jóni Ólafssyni. Þessi heimild verður þó væntanlega úreld eftir u.þ.b. 10 daga - því þá verður geymslutími efnisins liðinn.

Það verður að taka það fram að við berum mikla virðingu fyrir Hlíðinni þó við blótum henni í söngnum. Meira svona listrænt frelsi og fór vel við lagið.

Ég sakna þín ekki hót

2006-12-10T18:26:00.000Z

Augusto Pinochet dó í dag. Hann varð 91 árs sem er vel yfir meðaltalinu í Chile. Á 8. áratugnum kom hann mörgum fyrir kattarnef - flestir þeirra náðu ekki einu sinni 20 ára aldri. Hann myrti helsta andstæðing sinn Salvador Alliende 11. september 1973. CIA hjálpaði til við verkið enda óttuðust Bandaríkjamenn félagshyggjuöflin í Suður-Ameríku meira en djöfulinn sjálfan. Pinochet var aldrei sóttur til saka fyrir voðaverk sín og í 10 ár var heilsa hans notuð sem afsökun fyrir aðgerðarleysinu. Ég man ekki til þess að hann og dauðasveitir hans hafi nokkuð tekið tillit til heilsu þeirra sem þeir hnepptu í varðhald og pyntuðu og drápu. Járnfrúin breska talaði fallega um vin sinn Pinochet fyrir nokkrum árum og botnaði ekkert í þeim sem vildu draga hann fyrir dómstóla. Legg til að við minnumst fórnarlamba Pinochet og vina hans í CIA.

Ég sakna Pinochet ekki neitt.

Kók og bland í poka

2006-12-09T18:23:00.000Z

Það fer kannski vel á því að í mánuði ofáts samþykki alþingi Íslendinga að lækka verð á gosdrykkjum og nammigotti. Á meðan þjóðirnar í kringum okkur reyna að stýra neyslunni með vörugjöldum ákveðum við að fara aðrar leiðir. Engu virðist skipta þótt þjóðin fari fitnandi og að gos- og sælgætisneysla okkar aukist jafnt og þétt. Allar tilraunir til að benda á ávinning neyslustýringar eru umsvifalaust skotnar niður með þeim rökum að um forræðishyggju sé að ræða.

Hlaupum því út í sjoppu og kaupum okkur bland í poka og kók – verðið fer fallandi.

Samgöngur

2006-12-04T13:42:00.000Z

Sorgleg helgi í umferðinni. Umferðarþunginn að aukast á helstu þjóðvegum með tilkomu sprengingar í bílainnflutningi og síðast en ekki síst með vöruflutningum sem færðar voru af sjó á land. Í framhaldi slíkra slysa fara eðlilega af stað umræður um samgöngumál og það sem betur mætti fara á þeim vígstöðvum. Fólk er reitt og krafist er tafarlausra úrbóta. Þetta er allt skiljanlegt en því miður ómarkvisst og jafnvel krampakennt.

Líkleg niðurstaða í þessu máli verður að þjóðarsátt skapast um að tvöfalda Suðurlandsveg að Selfossi og Vesturlandsvega að Hvalfjarðargöngum. Algjörlega réttlætanlegar framkvæmdir sem ekki nokkur mun mótmæla. En það er sorglegt að við skulum þurfa að ganga í gegnum tilgangslausar fórnir til þess að raunverulegt skrið komist mál.

Við verðum að komast upp úr hjólförum viðbragðslausna. Slíkar lausnir eru sjaldnast jafn farsælar og velígrundaðar lausnir. Samgönguyfirvöld bera ekki ein ábyrgð á þessari stöðu. Það era allir Íslendingar ábyrgð. Hvað á það t.d. að þýða þegar landshlutar berjast við aðra landshluta um fé til framkvæmda? Oddsskarð vs. Óshlíð – Reykjanesbraut vs. Suðurlandsvegur o.s.frv. Lobbyisminn tröllríður stjórnsýslunni og hagsmunapot einstaklinga getur skipt sköpum. Hér er ég ekki að taka út einhvern einn ráðherra eða einhvern einn flokk – þetta á við okkur öll. Lobbyisminn grefur skotgrafir á milli samherja.

Ég er fylgjandi tvöföldun hringvegarins eins og hann leggur sig eins og Styrmir Gunnarsson hefur ítrekað bent á í leiðurum og ræðum. Fyrsti hluti þeirra framkvæmda ætti svo sannarlega að vera í kringum höfuðborgina – það segir sig sjálft. En ég er líka á því að nú þurfi samgönguyfirvöld og landsmenn allir að sameinast um það að koma vöruflutningum aftur á sjó. Trukkarnir eru of stórir og of margir fyrir ásetið vegakerfi okkar. Kostnaðurinn kann að vera nokkur að koma þessu aftur í skipin en kostnaðurinn vegna hvers mannslífs og þeirra skemmda sem slysin valda er mun meiri.

Það þarf að hugsa stórt þegar samgöngur eru skoðaðar. Hættan við þá tíð sem nú ríkir er að í vor eru kosningar. Við slíkar aðstæður víkur skynsemin á stundum fyrir óttanum við slakt gengi í kosningum.

Ferðalag

2006-12-03T00:36:00.000Z

Ég ætla að keyra til Reykjavíkur á morgun. Mér er það þvert um geð en í þágu málstaðarins má skjótast til Höfuðborgarinnar fyrir stutt stopp. Ferðafélagarnir eru heldur ekki af verri endanum. Eva Grímsdóttir og Lýður Árnason verða í bíl með mér. Í öðrum bíl verður restin af Grjóthruninu. Stefni á sveittan borgara á Brú.

Það er ýmislegt sem á daga þjóðfélagins hefur drifið síðustu vikurnar og óábyrgir menn gætu gert sér mat úr mörgu. Mig langar stundum að vera einmitt þannig en börn hafa 100 mál og við tökum 99 af þeim.....

Gestur náði ágætri kosningu í prófkjöri VG á Höfuðborgarsvæðinu - gæti verið raunhæft að hann dytti inn sem varaþingmaður. Fátt kom á óvart. Kannski hvað Álfheiður fékk góða kosningu en hún hefur lengi verið á leiðinni upp töfluna.

Ábreiðugestur

2006-12-01T09:22:00.000Z

Gestur Hafnarfjarðarbersi fer mikinn í mogganum og á bloggsíðu sinni þessa dagana. Ég er oftast algjörlega sammála Gesti og hef sagt það hér og segi það enn að þingheimur yrði betri með þann ágæta mann innanborðs. Hins vegar ætla ég aðeins að deila á hann þegar kemur að tónlistarsmekk. Ég gaf honum og Dóru í brúðkaupsgjöf frípassa á alla tónleika Austur Þýskalands á síðasta ári. Þau létu sig iðulega vanta á viðburðina. Margar þeirra fjarvista voru nær guðlasti en fjarvistum. Í gær frétti ég síðan af Gesti í Laugardalshöllinni á risastóru ábreiðuhófi. Sagt með fullri virðingu fyrir Magna þeim mikla meistara og hans frábæru fjölskyldu sem ég þekki bara af góðu einu.

Gestur, get ég treyst því að þetta lagist þegar þú kemst á þing? Kjósendur þínir þurfa að fá að vita þetta?

Rúðuþurrkurnar

2006-11-29T19:36:00.000Z

Þær eru ónýtar. Höfðu ekki undan í krapaslabbinu í gær. Mótorinn brann yfir og nýji Opelinn veldur vonbrigðum. Hvað á maður að segja þegar Toyota Corolla ala 1994 keyrir borubrött framhjá með rúðuþurrkurnar á fullu á meðan Zafírinn frá maí 2005 þolir ekki smá krapa? Ætli Ingvar Helgason komi til mín með nýjan mótor á morgun? Það verður frekar - því miður en við þessu er ekkert að gera. Kannski að ég leiti á náðir Hafsteins á Bílatanganum og kanni möguleikana...

Annars hef ég það á tilfinningunni að allt sé að springa út hér fyrir Vestan. Kraftur og stuð er einkennandi her á Vitastígnum - ég held að þennan kraft megi finna í fleiri húsum á svæðinu. Lýður og bandið allt komið í megrun og ég með. Veit ekki hvort menn innan bandsins taki undir þetta en það kemur þá af stað umræðum á næstu æfingum. Alltaf gott að stofna til umræðna.

Steingrímsfjarðarheiðin og fleiri vestfirzkir vegir settu stein í götu Grjóthrunsins í kvöld. Ég held að það fari að koma tími á fleiri láglendisvegi og eins og tvöþrjú göng....

Uppgjörið við Stalín.

2006-11-27T14:55:00.000Z

Í Sovétríkjunum Stalíntíminn gerður upp með eftirminnilegum hætti þegar Níkíta mætti til leiks. Í Kína er Maótíminn gerður þannig upp að menn eru farnir að játa að 15% af því sem Maó gerði hafi verið mistök. Þetta mistakahlutfall hefur aukist jafnt og þétt sl. ár.

Á Íslandi bresta framsóknarmenn í uppgjör og viðurkenna mistök gagnvart Íraksstríðinu núna í aðdraganda kosninga. Sjálfstæðisflokkurinn vill líka vera með á þessum játningavelli en væntanlegur oddviti flokksins í NA segir að innrásin hafi verið mistök. Í 3 ár hafa báðir þessir flokkar keppst við að réttlæta ákvörðun sína og neitað að ræða hana með rökrænum hætti. Frasinn korteri fyrir kosningar á vel við í þessu samhengi – og er ljóst að það á að reyna að halda í vinstrihelming kjósendanna.

Er þetta sannfærandi......

Erfitt að vera Jón

2006-11-26T12:32:00.000Z

Björn Bjarnason er ekki sáttur við Jón Sigurðsson iðnaðarráðherra og formann Framsóknarflokksins. Jón opnaði Írak í ræðu sinni og taldi stríðið mistök. Björn lýkur pistli sínum um Jón á himasíðusinni með þessu orðum:

Athygli vekur, að hið eina, sem Jón Sigurðsson hefur að segja um utanríkis- og öryggismál á þessum miklu breytingatímum snertir tæplega fjögurra ára gamla atburði. Þótt vissulega skipti miklu að ræða þá til hlítar og leggja mat á þá, er jafnljóst, að þeirri fortíð verður ekki breytt. Þessir atburðir eru hluti sögunnar og viðfangsefni í því ljósi og uppgjörið vegna þeirra verður mun dramatískara annars staðar en hér á landi. Við íslenskum stjórnmálamönnum blasir hins vegar að stýra þjóðinni við nýjar aðstæður í öryggismálum og gjörbreyttar aðstæður að því er varðar hlut hennar og íslenskra fyrirtækja á alþjóðavettvangi og þá ekki síst með tilliti til alþjóðaviðskipta.

Það er vandlifað að vera Jón þessa dagana. Samstarfsflokkurinn fúll og flokksfélagar Jóns líka.

Játningar

2006-11-25T12:55:00.000Z

Nú styttist í prófkjör VG í Höfuðborgarkjördæmunum. Sniðugt að taka þessi kjördæmi saman. Það eru margir ágætir í boði þarna og jafnvel mjög frambærilegir. Gestur Svavarsson er t.a.m. einkar öflugur maður. Það væri fengur í slíkum manni á þing - þekki hann bara af góðu. Guðfríður Lilja er líka mikill snillingur - og ótrúlegur fengur fyrir VG. Árni Þór hefur lengi verið í sveitarstjórnarmálunum og kæmi þekking hans sér ágætlega á þingi enda virðist þingið ekki alltaf átta sig á stöðu sveitarfélaganna. Kata er alltaf að fá meiri ballast og líklega er akkúrat hennar tími núna.

Ég kýs ekki þarna enda hættur í flokknum. En ég endurtek - þarna er margt gott fólk á ferðinni sem gott verður að fá á þing.

Aukajól

2006-11-24T18:13:00.000Z

»Juleaften er ikke længere højdepunktet, men snarere et slutpunkt«, siger lederen af Dansk Folkemindesamling, Else Marie Kofod, der forsker i traditioner og ritualer.I det hele taget er den traditionelle jul i opbrud. Salget af udlandsrejser boomer, bedsteforældrene flygter fra familien og tager på højskole, og julegaverne er skiftet ud med velgørenhed. Mange restauranter og barer holder åbent, fordi folk ikke kan holde mere jul ud. Nytåret bliver større højdepunkt. Nytårsaften er ifølge Else Marie Kofod juleaftens værste konkurrent. »Før i tiden var det ultimative højdepunkt juleaften, og så kom julehyggen i dagene helt op til nytår. Selve nytårsaften var ikke noget særligt. Det er det blevet, fordi man er sammen med vennerne. I dag starter nytårsforberedelserne allerede tredje juledag, så højdepunkterne er simpelthen blevet forrykket«, siger hun.

Þetta er auðvitað grafalvarlegt mál. En eigum við ekki að trúa að Danir séu eitthvað frábrugðnari en við. Hins vegar er þetta alveg ómöguleg þróun þessi auka-auka jól.

Hátíð

2006-11-23T08:33:00.000Z

Átti að flytja ræðu á “ríjúníói” nemenda sem útskrifuðust úr Hlíðaskóla árið 1986. Þetta átti að gerast 4. nóvember en veður voru válynd og því fór Grímur ekki suður. Mér þótti það leiðinlegt. Hérna er ræðan:

Haustið
Klukkan er níu eða er hún kannski 12? Það er september og árið er 1979. Ég stend fyrir framan nýja skólabyggingu. Ég er nýkominn frá Raufarhöfn þar sem ég var með langömmu minni eins og önnur sumur eftir sveitina. Hafði byrjað á Egg í Hegranesi og endað á Ríben hjá ömmulín.

Ísaksskóla er lokið og nýr kapítuli að hefjast. Bý vel að teiknihæfileikum eftir árin hjá Herdísi Egilsdóttur. Búinn að fara í fisk hjá Rúnari Gests og stunda stríðsleiki með Árna Kristjáns. Ég er bjartur yfirlitum með ljósa lokka. Amy Engilberts spáði fyrir foreldrum mínum þegar ég var ókominn í þennan heim að fiðluleikari með ljósa lokka væri á leiðinni.

Á skólalóðinni má sjá börn að leik. Strákar í fótbolta og stelpur í parís. Tek strax eftir því að liðin á fótboltavellinum eru ansi misskipt. Í öðru liðinu er sterklegur strákur í teygju merktri Pelé og annar strákur frekar hippalegur til fara og greinilegt að foreldrarnir hafa tekið þátt í byltingarlegu vafstri. Hitt liðið saman stendur af öllum hinum – u.þ.b. 14 strákum sem elta Pele og kommúnistann.

Stelpurnar í parísnum vöktu auðvitað talsverðan áhuga enda nokkrar verulega sætar. Hallgerður Langbrók eða staðgengill hennar á 20. öldinni hafði sig mest í frammi og stjórnaði aðgerðum. Tilvonandi barnæskuást mín stóð þar skammt hjá og önnur þrætuepli - evukyns - næstu ára einnig.

Ég stend sem fastast enda kann ég hvorki fótbolta eða parís – ég var í Ísaksskóla, þar voru æðri listir ástundaðar og taktískir herleikir. Skyndilega hringir bjallan og ég álpast í röð. Þar sem ég stend og reyni að taka vel eftir umhverfinu er hendi laumað í lófann á mér. Hjartað tekur kipp – getur verið að þetta sé sæta stelpan sem var í parís? Stelpan sem ég tók eftir í fyrradag þegar ég var að fara til pabba í Grænuhlíðina? Ég læt mig dreyma – á örskotsstundu rennur allt líf mitt til þessa dags í gegnum huga minn og öll árin sem ég og stelpan þarna uppi í húsinu við hliðina á pabba munum eyða saman. Endalausir spagettívestrar á laugardagskvöldum með appolólakkrísafgöngum – er hægt að hugsa sér betra líf?

Ég gleymi mér alveg og loka augunum. Sný mér að stúlkunni og set stút á varirnar. Taugaveiklun fyrsta skóladagsins hefur komist í miðtaugakerfið og drepið alla skynsemi og alteregóið tekur við. Hún er mín – þessi eina hún er mín. Við göngum um akra bíóhúsanna, Star Wars, Grease og brilljantín. Ég er flottastur og hún er alveg sammála.

Ég opna augun og lít á drottningu minna drauma rétt áður en ég kyssi hana. Hjartað hættir að slá. Við hlíð mér stendur fremur renglulegur drengur með freknur og kartöflunef. Þetta er ekki stúlkan sem mér var ætluð. Þetta er eitthvað allt annað. Fyrirbærið segir hæ og spyr mig: Ertu nýr eins ég? Ég var að flytja í bæinn frá Akureyri – ég heiti Mörður.

Lok sögunnar eru öllum kunn. Hárlitur og allt mitt fas breyttist. Fíngerði listamaðurinn með ljósu lokkana vék fyrir makkinu með braskaranum að norðan. Tónlistarkennsla Jóns Kristins Cortes kom alveg í veg fyrir fiðluleik en hann reyndist vera hinn mesti fauti. Allur áhugi á íþróttum lagðist í dróma við kennslu hins natna barnahatara Þórarins R. En í hundana hefði maður algjörlega farið ef meistara Árna Pé hefði ekki notið við auk Ásdísar ömmu hans Krissa sem sinnti okkur svo vel á göngunum. Þóra og Sigurbjörg komu líka auga á að innst inni var drengurinn með ljósa lokka og fiðlustreng.

Góðlegi hippastrákurinn sem fékk slétt og fellt skódauppeldi í Hlíðunum er eins og allir vita innsti koppur í búri í ríkasta fyrirtæki Íslands þar sem hann lemur á saklausum lífeyrissjóðsgreiðendum – sendir þeim í besta falli teppi. Hann býr ekki lengur í Hlíðunum heldur í Arnarnesinu en þar búa menn af hans sauðarhúsi. Við getum aðeins gert okkur í hugarlund hvernig foreldrum þessa pilts líður.

Gulli Pelé með símanúmerið 50459 lifði á rækjusamlokum og krónukössum fram eftir grunnskóla. Hann fór þó að ókyrrast síðustu dagana í Hlíðaskóla og reyndi sitt besta í frægu skólaferðalagi í Þórsmörk. Hann kom fyrir í potti fiskbollum úr Oradós og hitaði. Að hræra var meira en Pelé réði við þannig að heitur var rétturinn efst en kaldur neðst. Honum hefur farið lítið fram við matseld þeim ágæta manni.

Drottningar drauma minna fóru allar í aðra átt en ég. En þær eiga árin frá því ég var 8 ára þangað til að ég fékk fyrsta skeggbroddinn. Skálum fyrir þeim og öllum þeim sem þvældust með okkur þessi ár hafta – fremstir í flokki voru þeir Utangarðsmenn og drengirnir í Rickshaw. Blue Nun, Torres og brennivín í póló....

Þetta voru ágæt ár.

Valur var einu sinni fugl...

2006-11-21T16:09:00.000Z

sem flaug hátt. Ungir efnilegir menn í flestum stöðum í karlaflokki og allir hressir - þetta var í kringum 1987. Menn eins og Baldur Bragason, Einar Þór Daníelsson, Gunnlaugur Einarsson, Gunnar Már Másson, Steinar Adolfsson, Þórður Bogason, Jón Þór Andrésson og Arnaldur Loftsson voru að stíga sín fyrstu skref með meistaraflokki. Eggert Magnússon var prímus mótor í stjórn félagsins. Það var ekki veðjað á ungu mennina. Heimir Karlsson og Lárus Guðmundsson voru keyptir fyrir metfé og Valur tók dýfu. Ungu strákarnir hættu flestir að spila með Val og fóru til annarra félaga þar sem þeir gerðu góða hluti. Ég vona að Eggert Magnússon hafi sjóast í fótboltaleiknum.

Reykjavík

2006-11-20T12:07:00.000Z

Margir dagar í Reykjavík að baki. Sufjan var frábær – þrátt fyrir minniháttar hnökra á framkvæmdinni: kalt, þröngt og salernisaðstaða vond. Ég ber ábyrgð á því ekki Sufjan en hann skilaði sínu með ótrúlegum hætti! Með flottari viðburðum.

Valdimar Leó hætti í Samfylkingunni og gerðist óháður um helgina. Ónefndur þingmaður kallaði hann reyndar um daginn Valdimar Lúðvík en eins og margir vita er sá Valdimar eðalkrati að vestan. En það er ekki kjarni málsins heldur þessi brottför hans. Ég skil ekki þetta fyrirkomulag. Maður sem kosinn er á þing fyrir ákveðinn stjórnmálaflokk (reyndar sem 3. varamaður) ákveður að hætta í flokknum en ætlar samt að halda áfram að vera þingmaður – er þetta eðlilegt? Hér er ekkert lýðræði á ferðinni og heldur ekki korrekt siðferði. Ég hugsa að 4. varamaður flokksins gæti vel hugsað sér að starfa fyrir flokkinn. Mér fannst það jafn einkennilegt þegar Gunnar Örlygsson skipti yfir í Sjálfstæðisflokkinn – man reyndar ekki hvernig þetta var með Kristinn H. Kjósendur eru að velja fólk til næstu fjögurra ára ekki í nokkra mánuði í senn. Þeir sem kusu Valdimar Leó og Gunnar Örlygsson voru ekki að kjósa menn á lista óháðra.

Hef verið að heyra meira og meira minnst á fjórflokkinn svokallaða að undanförnu. Skilgreiningin hefur verið að VG, Sjálfstæðisflokkurinn, Samfylkingin og Framsóknarflokkurinn séu gamli fjórflokkurinn. Frjálslyndir telja sig ekki til þessa fjórflokks. Ég er svo sem sammála því að Frjálslyndir eru ekki partur af gamla fjórflokknum en það eru VG og Samfylkingin ekki heldur. Í öllum stjórnmálaflokkum á Íslandi er fólk sem tók þátt í stjórmálastarfi innan fjórflokksins - ekki síst í Frjálslynda flokknum. Gamli fjórflokkurinn er löngu dauður og er það alveg ágætt.

Atli Magnússon

2006-11-14T18:52:00.000Z

Las undarlega samantekt um stöðu þýðinga í bókaflórunni á Íslandi í mogganum í dag. Þar voru þýðendur nokkrir tilteknir en eitt nafn algjörlega undanskilið. Síðustu ár hefur einn þýðandi borið höfuð og herðar yfir aðra þýðendur hvað afköst og athyglisverð verk áhrærir. Verkin sem eftir liggja eru m.a.: Meistari Jim, Nostromo, Morgunverður á Tiffanys, Aðrar raddir aðrir staðir, Nóttin blíð, Carrie systir, Fall konungs og Borgarstjórinn í Casterbridge. Þessi verk hafa komið út sl. 7 ár. Mér rennur blóðið til skyldunnar þegar ég bendi á afrek Atla Magnússonar. Þegar menn ætla að fjalla af einhverri alvöru um þýðingar bókmenntaverka á Íslandi er augljóst að hans hlut þarf að telja með. Ég hef ekki viljað taka undir með mönnum þegar þeir benda á lagskiptingu bókmenntanna á Íslandi. Pabbi hefur hins vegar lítið verið hampað og það þykir mér miður. Hann á hrós skilið fyrir magnaðar þýðingar.

Sunnudagur

2006-11-12T18:50:00.000Z

Mikil veisla í dag og ég tek ljóst að mjög vantar upp á kröftuga líkamsrækt næstu vikurnar til þess að brenna veigum Frú Númer 12. Langaði reyndar að horfa á Liverpool – Arsenal í dag en veislan bjargaði. Afleit úrslit og bayonnesskinkan var góð sárabót. Man að eitt prinspólóstykki þýddi (og þýðir enn) að maður þyrfti að draga líkamsþyngd sína upp á Esjuna.

Gott að liggja á meltunni í kvöld og gera ekkert. Spurning hvort eitthvað af þessum 15 ínáanlegu vestfirsku sjónvarpsstöðvum bjóði upp á tæra snilld fyrir slík tilefni?

Í gær lék Grjóthrunið fyrir dansi í pásum á balli í Víkurbæ. Höfðingjarnir í Baggalúti voru aðalmenn kvöldsins og stóðu sig með mikilli prýði. Ég gat ekki betur séð en Ísfirðingar og aðrir nærsveitarmenn hafi fjölmennt á ballið og er það gott. Gleðin fór vel fram og veður hélst gott.

Grjóthrun

2006-11-10T08:46:00.000Z

Grjóthrunið mætir til leiks á laugardaginn. Lýður er í miklum ham enda tilnefndur til Edduverðlauna þetta árið. Læt hér fylgja meistaraverk Braga Valdemars um Víkina

Lesbók - Gagnrýni: Nói albínói

Ekki veit ég hvað ungum kvikmyndagerðarmanni gengur til, þegar hann heldur af stað með fríðu föruneyti, peningakistlum og vistum til að taka kvikmynd í fullri lengd - og velur til þess, fram yfir allar þær fannfergðu fjallahvilftir sem finnast á Vestfjörðum, - sjálfast erkiklóak hins siðmenntaða heims, vítispyttinn og ömurðarkvosina Bolungarvík!

Þetta þykja mér undarleg vinnubrögð, sérdeilis og sér í lagi í ljósi þess að steinsnar frá gallfylltri dómsdagsvíkinni þeirri arna má finna glitrandi perlu, unaðsreit sem hvílir þögull milli fannfergðra fjallstinda og horfir yfir djúpið. Já þar má líta heiðbláan Hnífsdalinn, hlýlegan, gjöfulan.

En það var ekki nógu gott fyrir borgalinn uppskafinn sirkússtjóra að sunnan, nei. Hann þeysti í blindni framhjá dalnum hvíta með allt sitt hafurtask, kaffi og meððí og kaus heldur að fremja sín vélabrögð og drísilkúnstir á náströndum þeirra Bolunga.

Gott og vel. Ég kyngdi stoltinu, beit mig fastan í stólbakið og lét mig hafa að horfa á ósköpin, enda sanngjarn maður. Mér að óvörum var myndin góð, meir að segja mjög góð - og smám saman fyrirgaf ég strákkvikindinu næstum að hafa valið þennan ógeðfellda tökustað.

Nói sjálfur var frábærlega leikinn af vandlega rökuðum pilti, hálffrönskum, og var ekki laust við að óvanalegt látbragð hans næði að hluta að bræða mitt helfrysta hjarta. Aðrir stóðu sig bærilega, þó ég fyrirgefi fjandakornið engum að taka að sér hlutverk andskotanna í norðri.

Sagan er einföld, einsemd og tilbreytingarþurrð veraldarhjarans skín úr hverju smáatriði og undir lokin óttast maður jafnvel pínulítið um afdrif Nóa. En allt fer þó vel að lokum og víkarahelvítin fá makleg málagjöld.

Og nú sum sé flakkar um heiminn bíómynd úr Bolungarvík, þessu höfuðbóli viðurstyggðar og óeðlis, Gómorru norðursins. Hef ég fyrir satt að myndin hali inn hin og þessi verðlaun og er það í sjálfu sér gott og blessað - en eitt vil ég þó segja leikstjóranum knáa að skilnaði: Það þýðir ekki að steyta hnefa og sjúga í nös að ári þegar þú horfir volandi á eftir óskarnum í hendur einhvers brasilísks fúskara - þá er of seint að slá upp búðum í Hnífsdal.

Þetta er einkar myndrænn kvikmyndadómur....

Heyrði það í Blaðinun og sá það á hljómplötu

2006-11-09T09:52:00.000Z

Frægasti njósnaforingi Austur-Þýskalands látinn
Markus Wolf, fyrrum yfirmaður austur-þýsku leyniþjónustunnar, er látinn 83 ára að aldri. Wolf var einn af áhrifamestu mönnunum í kalda stríðinu svonefnda en hann stýrði erlendri starfsemi leyniþjónustunnar, sem nefnd var Stasi, um 30 ára skeið. Þegar Berlínarmúrinn svonefndi féll árið 1989 voru fastir starfsmenn Stasi um 90 þúsund og mörg hundruð þúsund manns voru einnig á launaskrá leyniþjónustunnar sem uppljóstrarar.

Við þurfum samt ekki að hafa af þessur neinar áhyggjur. Austur Þýskalandið sem flutt er til Bolungarvíkur tengist þessum höfðingja ekki neitt. Eins og allir vita vantar mínusinn í Austrið í Bolungarvík (sumir kalla það reyndar bandstrik).

Upp flaug frjálslyndið

2006-11-09T00:43:00.000Z

Ólyginn sagði mér að innflytjendaskoðanakönnunin gefi Frjálslyndum 11%. Nú er að það bara spurningin - hvert ætlar þjóðin? Eigum við að ganga til framtíðar eða rúlla aftur til fortíðar? Þetta eru viðvörunarbjöllurnar - gott að þær heyrist en mikilvægast að taka mark á þeim. Allir tapa nema Samfylkingin af hinum flokkunum. Kannski vegna þess að Steinunn Valdís var akkúrat á hinum endanum þegar Magnús Þór greip gæsina.

Dásamlegt

2006-11-08T13:20:00.000Z

Casimir Pulaski Day með Sufjan Stevens

Golden rod and the 4-H stone
The things I brought you
When I found out you had cancer of the bone

Your father cried on the telephone
And he drove his car to the Navy yard
Just to prove that he was sorry

In the morning through the window shade
When the light pressed up against your shoulder blade
I could see what you were reading

Oh the glory that the lord has made
And the complications you could do without
When I kissed you on the mouth

Tuesday night at the bible study
We lift our hands and pray over your body
But nothing ever happens

I remember at Michael's house
In the living room when you kissed my neck
And I almost touched your blouse

In the morning at the top of the stairs
When your father found out what we did that night
And you told me you were scared

Oh the glory when you ran outside
With your shirt tucked in and your shoes untied
And you told me not to follow you

Sunday night when I cleaned the house
I find the card where you wrote it out
With the pictures of your mother

On the floor at the great divide
With my shirt tucked in and my shoes untied
I am crying in the bathroom

In the morning when you finally go
And the nurse runs in with her head hung low
And the cardinal hits the window

In the morning in the winter shade
On the first of March on the holiday
I thought I saw you breathing

Oh the glory that the lord has made
And the complications when I see his face
In the morning in the window

Oh the glory when he took our place
But he took my shoulders and he shook my face
And he takes and he takes and he takes

Þetta er gott

2006-11-06T00:36:00.000Z

Mér þykir skemmtilegra að tala um Snærós og hennar afrek en þrasa. Hérna er sigurskrekkurinn . Hún er ansi snjöll stúlkan sú arna. Hún var einmitt stödd hjá okkur um helgina í góðu yfirlæti ástamt Ástríði. Eva er hér enn - veðurteppt og hress. Hún þyrfti nú samt að komast í skólann aftur fljótlega.

Fenjafólkið

2006-11-05T17:43:00.000Z

Jæja, það kom þá að því að einhver flokkanna tók upp málefni útlendinga í anda fáviskunnar. Frjálslyndi flokkurinn lenti í kröppum dansi í síðasta mánuði þegar Einar Kristinn heimilaði hvalveiðar. Frjálslyndir fengu á baukinn þar og þurftu nauðsynlega að finna sér nýtt mál til að berjast fyrir. Ég spáði því reyndar að hluti flokksmanna tæki þetta mál upp fyrr en raunin varð. Jón Magnússon er nýr liðsmaður frjálslyndra en hann og Magnús Þór Hafsteinsson eru Pia Kærsgaard og Mogens Glistrup okkar Íslendinga.

Í Danmörku eru það einna helst svokallaðir Bodega-Danir sem aðhyllast arískan hugsanahátt. Fenjafólk kýs ég að kalla fólk þar sem sleggjudómar og ömurleg fáviska stjórna ferðinni. Þetta er grafalvarlegt mál. Ég trúi því ekki að Margrét Sverrisdóttir taki undir þessi sjónarmið – hvað með Guðjón Arnar?

Ég vona svo sannarlega að hinn annars ágæti Frjálslyndi flokkur aðgreini sig sem fyrst frá þessum skoðunum. Ef þetta er leiðin sem flokkurinn ætlar sér á hann ekkert skilið annað en að þurrkast út af þingi. Við þurfum að henda fordómunum og hugsa aðeins út fyrir okkar litla garð. Heimurinn er stór og við erum þátttakendur í honum. Með því að hugsa útfrá heildinni, í stað þess að þvælast um með Litlu Gunnu og Litla Jóni, mun framtíð Íslands verða björt.

Jón Valgeir Hermannsson

2006-11-04T11:29:00.000Z

Við eigum sama afmælisdag ég og hann langalangafi minn. Hann keypti jörðina Súðavík þegar hann missti af skipinu til Ameríku rétt fyrir aldamótin þarsíðustu.

Norðurkjallari og Ráðhús

2006-11-04T10:46:00.000Z

Sit í Ráðhúsinu og tek á móti Bolvíkingum sem hafa hug á að kynna sér fyrirhugaðan snjóflóðavarnagarð. Hlusta á Sufjan Stevens og hlakka óendanlega að sjá hann í Fríkirkjunni þann 17. og 18. nóvember. Ætla líka að sjá Sykurmolana í Höllinni en þau spila strax á eftir Sufjan þann 17. nóvember. Er ekki viss um að allir Íslendingar geri sér grein fyrir hvað það er merkilegt að Sykurmolarnir skuli ætla að spila. Það hafa aldrei jafn margir boðað komu sína á eina tónleika frá útlöndum eins og á þessa Molatónleika. Samt er ekki orðið uppselt og er það óskiljanlegt. Þið þarna úti sem eruð ekki vöknuð – vaknið!

Man eftir dásamlegu kvöldi í Norðurkjallara MH haustið 1987 – eða var það ári seinna? Aldrei höfðu svo margir komið á tónleika í kjallaranum – líklega 150 manns. Í dag þykir slappt ef mætingin er undir 200 í Norðurkjallarann. Kórinn með sprúttsölu og kennarar og nemendur skemmtu sér í hóp. Sætustu stelpurnar, sætustu strákarnir, ég og allir hinir – sumir ákjósanlegir aðrir minna. Sykurmolarnir voru algjörlega frábærir í þessu umhverfi. Duus hús gigginn sitja föst í höfðinu. Rosebud spilaði nokkrum sinnum þar, oftar en ekki sem upphitun fyrir Bless eða Ham. Einu sinni spiluðum við sjálfir og fengum m.a. Sveinbjörn Beinteinsson til að “hita upp”. Þegar kom að því að gera upp við meistarann þá bað hann bara um tvöfaldan brennivín í vatn.

Þetta er rakin snilld:

John Wayne Gacy, JR

His father was a drinker
And his mother cried in bed
Folding John Wayne's T-shirts
When the swingset hit his head
The neighbors they adored him
For his humor and his conversation
Look underneath the house there
Find the few living things
Rotting fast in their sleep of the dead
Twenty-seven people, even more
They were boys with their cars, summer jobs
Oh my God

Are you one of them?

He dressed up like a clown for them
With his face paint white and red
And on his best behavior
In a dark room on the bed he kissed them all
He'd kill ten thousand people
With a sleight of his hand
Running far, running fast to the dead
He took of all their clothes for them
He put a cloth on their lips
Quiet hands, quiet kiss
On the mouth

And in my best behavior
I am really just like him
Look beneath the floorboards
For the secrets I have hid

Scrooge

2006-11-03T08:34:00.000Z

Í gær fór hún Eva mín að skoða skólann hennar Ástu Júlíu í Bolungvarvíkinni. Eva er í Melaskóla öllu jafnan en kemur til okkar í Víkina reglulega. Ég held að þetta hafi verið skemmtilegur dagur hjá henni. Ég var hins vegar á ferðalagi í gær en veðrið brá fyrir mig fæti. Ég lét það ekki snúa á mig! Keyrði vestur og svigaði framhjá 1300 músum sem voru greinilega á faraldsfæti líka.

En ég var að hugsa um skóla. Það er gott að hafa skóla í héraði. Ekki bara grunnskóla heldur líka framhaldsskóla. Nú á að spara á næsta ári og sá sparnaður eins og svo margt virðist engu skila öðru en smölunar nemenda af öllu landinu til Reykjavíkur. Undarlegur iðnaður er það sem unnin er í ráðuneyti menntamála. Er kominn einhver Scrooge í fólk? Sparnaður dagsins heitir reiknilíkan - ekki sparnaður eða niðurskurður. Öllu þarf nú að gefa nýtt nafn. Eftirfarandi sendu furðulostnir kennarar af NV-landi í fjölmiðla vegna þessara aðgerða:

Opið bréf til þingmanna Norðvesturkjördæmis

Við undirritaðir viljum með bréfi þessu vekja athygli á stöðu verknámsdeilda framhaldsskólanna í frumvarpi til fjárlaga 2007.

Allt iðnnám til Reykjavíkur?

Samkvæmt fjárlagafrumvarpi fyrir árið 2007 verður dregið úr fjárframlögum til verknáms í framhaldsskólum. Þetta er gert með því að gera ráð fyrir fleiri nemendum í hópum í iðnnámi og öðrum starfsbrautum. Þetta er gert í gegnum svokallað reiknilíkan menntamálaráðuneytisins og er raunar ekki í fyrsta skipti sem skólar verða fyrir barðinu á því. Frá því það var tekið upp hefur það oft verið notað til að skerða fjárframlög til framhaldsskólanna.

Í nýjum viðmiðunarreglum frá menntamálaráðuneytinu er breytt fjöldaviðmiðum í áföngum í starfsnámi. Þar er miðað við að í fagbóklegum áföngum sé lágmark

18 nemendur á sama tíma og hámarks viðmið í verklegum áfangum er 12 nemendur. Lágmarksviðmið í fagbóklegum áföngum er sett vegna hagkvæmnissjónarmiða en hámarksviðmiðið í verklegum áföngum er sett af öryggisástæðum. Á sama tíma og þetta er gert er einnig aukin krafa um heildarnýtingu kennslustunda innan skólanna, og verður hún núna 80%. Má af þessu sjá að svigrúm skóla til að halda úti iðn- og/eða starfsnámi minnkar mjög, þar sem fullur hópur dugar ekki til að ná ofangreindu nýtingarhlutfalli.

Iðnnám er í eðli sínu dýrt nám. Nemendur eru vegna öryggissjónarmiða fáir og aðstaða og búnaður dýr. Þegar við bætist að viðmið er sett óhóflega hátt og aðsókn minnkar er viðbúið að illa fari. Það er augljóst að framhaldsskólar Norðvesturkjördæmis verða að skera niður í iðngreinum og jafnvel fella út.

Nú þegar á iðnnám undir högg að sækja í þessum skólum.

Á sama tíma og eftirspurn eftir iðnmenntuðu fólki hefur aukist, er kreppt að skólunum með þessum aðgerðum. Langar okkur undirritaða að spyrja ykkur þingmenn þessa kjördæmis hvernig geti staðið á þessari vitleysu? Ekki hefur vantað stóru orðin í hátíðarræðunum um að auka veg starfsnáms. Er það virkilega raunin að þingmenn okkar, hvar í flokki sem þeir standa, ætli að horfa á aðgerðarlausir? Þá er hætta á að iðnnám verði flutt frá landsbyggðinni til Reykjavíkur, þar sem stærðarinnar vegna er hægt að halda þessi viðmið. Ef svo er, þá er það döpur niðurstaða, þar sem sífellt er talað um að gera verknámi hærra undir höfði.

Við skorum á ykkur að koma í veg fyrir að starfsnám verði lagt af í kjördæminu.

Verknámskennarar við:

Fjölbrautaskóla Vesturlands Akranesi
Fjölbrautaskóla Norðurlands vestra
Menntaskólanum á Ísafirði

Allt satt og rétt!

Frost og stilla

2006-11-01T10:03:00.000Z

Fallegur daguri í Víkinni. Létt frost og stilla. Helga Vala er í Reykjavík þar sem hún flutti erindi um heilabilun. Ég get ekki annað en brosað út í annað þegar fólk segir bæjarstjórann í Bolungavík ekki hafa hundsvit á heilabilun og að það sé best að láta fagfólkinu eftir skipulag þess málaflokks. Vissulega er ég ekki sérfræðingur í heilabilun - þ.e. útfrá öldrunarlækningum - en þó snérist verknám mitt á 3. ári og lokaverkefni í hinum alræmda Þroskaþjálfaskóla um heilabilun.

Skákmót og Baggalútur

2006-10-30T08:51:00.000Z

Hraðskákmót Íslands verður haldið í Víkinni 11. nóvmeber nk. Vegleg verðlaun í mörgum flokkum. Um kvöldið verður síðan haldið dansiball með Baggalút í Víkurbæ og Hólshreppurinn mætir einnig til leiks með sitt Grjóthrun. Mér segist svo hugur að þetta verði öflug helgi hér vestra og skora á nærsveitarmenn (nær og fjær) að fjölmenna - tefla og sprella. Þess ber að geta að ungir jafnt sem aldnir geta tekið þátt í skákinni.

Konur og fólk fætt eftir 1955

2006-10-29T21:52:00.000Z

NV-kjördæmi er ekki mikið fyrir konur á þing. Kjördæmið er heldur ekki mikið fyrir yngra fólk en 50 ára. Þetta snýr ekkert að einum flokki - heldur þeim öllum.

Spá

2006-10-29T18:16:00.000Z

Þar sem við sitjum hér í Víkinni og bíðum eftir tölum af Skaganum er rétt að hugsa til framtíðar. Ég man mann sem fór í prófkjör fyrir ári - hann er í öðru núna. Ég spái að Helga Vala verði að minnsta kosti borgarstjóri að ári.

Femínisminn á sunnudegi

2006-10-29T12:45:00.000Z

Egill Helgason fór mikinn um stöðu kvenna innan múslimasamfélaga. Egill var réttsýnn og vestrænn í skoðunum sínum. Hann sat við tölvuna í bókaherberginu með gleraugu á nefinu og básúnaði sínar femínísku áherslur. Þetta var inngangur Silfursins. Síðan hófst hið raunverulega Silfur. Egill og fjórir kallar settust niður og tóku að ræða um prófkjör o.fl. mál - m.a. um stöðu kvenna í póltík.

Þetta er auðvitað alveg fatalt. Alltaf sömu strákarnir að ræða um sömu lömuðu lummurnar. Konur með blæjur og ósýnilegar konur - það er ekki þannig að hinn vestræni heimur sé eitthvað sérstaklega með allt á hreinu í jafnfréttisbaráttunni. Egill er partur af þessu systemi. Fjölmiðlar almennt eru líka hluti af stöðunni. Konur fá lægri laun en karlar, þær eru í minnihluta í stjórnunarstöðum í gegnum opinbert og einkarekið atvinnulíf.

Ég held að menn ættu síðan að fá sér nýjan skraddara. Ekki smart að vera í þessu jakkasetti.

Gott gengi og vont gengi

2006-10-29T11:56:00.000Z

Björn féll og konur fengu enn og aftur vonda kosningu. Illugi, Guðlaugur Þór og Guðfinna eru sigurvegararnir og verður að segjast eins og er að Sólbakkafólkið stendur sterkt þegar leiðin er hálfnuð. Spurningin er hvað Björn Bjarnason gerir í framhaldinu ætli hann dragi sig í hlé fljótlega? Vilhjálmur Þ. studdi Guðlaug Þór á síðust metrunum og er ekki víst að Björn sé alveg sáttur við það.

Til þess að pakka þessu prófkjöri í réttar umbúðir er ekki úr vegi að spá kostnaði og hver eyddi mestu:

1. Guðlaugur: 15.000.000 kr.
2. Birgir: 12.000.000 kr.
3. Björn: 10.000.000 kr.
4. Illugi: 8.000.000 kr.
5. Guðfinna: 7.000.000 kr.
6. Sigurður: 5.000.000 kr.

Þetta kostaði kannski minna - kannski meira.